ناقه لر اینجتمیون یوللاردا نالان زینبی
اینجیدوب بس کی بو چولده قوم عدوان زینبی
آیریلاندان خیمه دن قارداشلاری ، اشکین الور
یدی قارداشی ئولوبدور بو محن قلبین دلور
گه باخور گوداله گه نهر اوسته ، آهو تک ملور
آغلاماقدان غم ائدوبدور سینه سوزان زینبی
دردین اظهار ایلمور از بس نجابتدن خانیم
آزقالور دوشسون بوچولده صبر و طاقتدن خانیم
سیز باری اینجتمیون یورقوندی غارتدن خانیم
بوندان آرتوق ائتمیون زار و پریشان زینبی
اود ووراندا قوم کین یاندی حسینون خیمه سی
زینبون عرشه اوجالدی قارداشیم وای ناله سی
ناقه لر غارتده یاندی قیزلارون بی عده سی
رحم ائدون چون قوم کین سالدی ایاقدان زینبی
بیر خانم که اگلشردی ، چوخ مرتب ناقه ده
ایمدی اما اگلشوب بیر نامرتب ناقه ده
شامه گوزیاشلی گئدور قول باغلی زینب ناقه ده
گور فلک چکدی هارا ظلمیله هاردان زینبی
مرتضادن زینب آلموش چون که درس غیرتی
باش وئروب هرگز قبول ائتمزدی جور و ذلتی
ساکت اگلشماقدا اما ناقه لر وار علتی
قارداشی ایلوب اسیرانه نگهبان زینبی
چون ائدوب قارداشینان روز ازلدن بیعتی
ایستیری تکمیل ائدوب باشه وئره بو نهضتی
سیندرانماز کل عالم گلسه بو شخصیتی
چون خدایه تاپشوروب شاه شهیدان زینبی
کوفه ده اما داشار قانی ائدر زینب قیام
مجلسه وارد اولاندا کیمسیه وئرمز سلام
پست روبه دن آلار اُول یرده اول انتقام
شیر تک ، خلق ایلیوب چون حی سبحان زینبی
ایمدی که حامل اولوبسوز شامه تک قیزلاره سیز
لطف ائدون حامی اولون یوللاردا یالقوزلاره سیز
داش آتاندا قویمیون دگسون اوغولسوزلاره سیز
دگسه داش ایلر یول اوسته خانه ویران زینبی
یولدا گورسز دوشدی قیزلاردان بیری یول گئتمیون
زینب زارون دوباره قلبینی قان ائتمیون
هر یره گئتسز گئدون اما او شامه یتمیون
ال چالانلار گوزلوری شام ایچره الان زینبی
ناقه لر « شیدا » خیالینده سیزه ایلور خطاب
قویمیون شمر ایلسون قمچیله یوللاردا عتاب
باشه چاتماز غصه سی گرچه یازیلسا مین کتاب
گور نجه آغلار قویوب بو چولده دونان ، زینبی
- جمعه
- 8
- مرداد
- 1400
- ساعت
- 11:11
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه