گلدی گینه ماه غم دیللره دوشدی نوا
فاطمه گلدی گینه اوغلونا دوتسون عزا
ترک ایلدی جنتی خاتم پیغمبران
دیلده اوغول وای گلوب بزم غمه مرتضا
گلدی ماه ماتم یا حسین
گییدی قاره عالم یاحسین
یا ثارالله یا ثارالله ( 3 )
چکدی گینه عرشینه قاره اوزی کبریا
دشت غمه یکسره گلدی هامی انبیا
گلدی ملکلر یره سالدیلا باشه قرا
ایوای آقام سسلدی اهل زمین و سما
دیللره غم دولدی یا حسین
گوزلره نم دولدی یاحسین
یا ثارالله یا ثارالله
زینبه غم باشلانار خیمده ایوای دیر
اللری اوسته رباب اصغره لایلای دیر
سسلر اوغول آغلاما جانیوه جانیم فدا
ال ایاقون چالما چوخ دردیوه یوخدور دوا
بو غمده سینمی داغلارام
چاره یوخ اللرون باغلارام
یا ثارالله یاثارالله
الده پیاله دورار نازلی سوسوز قیزلارون
سسلر عمو العطش خیمده اولدوزلارون
زینب او حالی گوروب غم اودونا اودلانار
ناله چکر سسلنر ایوای اوغولسوزلارون
وای اوگون حالینه زینبون
یانام احوالینه زینبون
یا ثارالله یا ثارالله
دوشسه ابالفضل گوزی قیزلاروون اشکینه
مشکی سالارچگینینه آل عبا عشقینه
جوت قولی باهم وئرر گورسه رقیه یانور
بیر گوزیده لطف ائدر دگمیه اوخ مشکینه
سو غمی سقانی یاندیرار
قیزلاردان چوخلی اوتاندیرار
یا ثارالله یا ثارالله
- جمعه
- 8
- مرداد
- 1400
- ساعت
- 11:26
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه