ای دشت غمده قانینه غلطان حسینیم
زینب بو توزلی قبریوه قربان حسینیم
سن باش وئروب بو چولده مقصوده چاتوبسان
عطشان یارالی قبریده قارداش یاتوبسان
سویله گوروم آیا منی گوزدن آتوبسان
گل بیر دیله منلن دانیش بیرآن حسینیم
کوچ ایلینده کربلادن شامه قارداش
دوشدوم کمند قوم بدفرجامه قارداش
عمروم یتیشدی آز قالا اتمامه قارداش
تا جسمیوی گوردوم قالوب عریان حسینیم
باشون جدایه ووردی تا شمر ستمگر
آزقالدی ئولدورسون ئوزون آل پیمبر
ایوای بابام وای سسلدی قیزلار مکرر
زنجیره چکدوقجا او بی ایمان حسینیم
تا کربلا ظلمی یتوب پایانه قارداش
جبریله میندوخ ناقه عریانه قارداش
جانه یتیشدوخ آند اولا قرآنه قارداش
یوللاردا چوخ ووردی بیزی عدوان حسینیم
تا کوفۀ ویران منه اولدی نمایان
سالدیم اشاقه باشیمی اولدوم پریشان
بیر لحظه تاپدیم تازه دن من آیری بیر جان
گوردوم اوخورسان نیزده قرآن حسینیم
قارداش باجی اول شهریده اود تک آلیشدوخ
قرآنه خاطر نطق ائدوب باهم دانیشدوخ
سن نیزه ده من ناقه ده قارداش چالیشدوخ
ظلم آشیانون ایلدوخ ویران حسینیم
تا سن دانیشدون ایلدون قرآنی احیا
منده یزیدی ایلدیم عالمده رسوا
حشره کیمی بیز ایلدوخ اسلامی برپا
دینه گرک امداد اولا هرآن حسینیم
شامه کیمی پروانه تک اودلاردا یاندیم
دوزدوم اگرچه ووردولار قانه بویاندیم
اما او اوچ ساعت که اول یرده دایاندیم
قلبیم اولوب اول وقتیدن سوزان حسینیم
دوشدی یولوم بیر مجلس ایچره ای یارالی
سالدیم اشاقه باشیمی اما حیالی
الله دئدیم ای کاش ئولم زهرا مثالی
تا وورمیه زخم زبان دونان حسینیم
ائتدی یزید دون بیزه قارداش شمادت
مست اولدی گوتدی خیزران اول پست فطرت
طشت طلاده باشیوه ائتدی جسارت
اولاد طاهانی ائدوب لرزان حسینیم
ووردی دوباره لبلرون قانیله دولدی
اهل و عیالون غنچه تک اول یرده سولدی
ئولدوردی قیزلار ئوزلرون بیر محشر اولدی
آز قالدی یانسون عالم امکان حسینیم
اول پست و دون بیر ظلم ائدوب آل ترابه
سالدی او گوندن زینبی آیری عذابه
وئردی بیزه مسکن اولوب کنج خرابه
حشره کیمی اولماز ایله زندان حسینیم
اول محبس ایچره بیزلره اولدی قیامت
شام اهلی هر گون ایلدی طعن و شمادت
بیر نصف شب گلدی باشون ائتجاق زیارت
ائتدی رقیه جان سنه قربان حسینیم
قارداش توکور گوزیاشینی « شیدا » عذاره
چوخ گویلی ایستیر یوز قویا بو گل مزاره
لطف ایله بیر وقفه گلوب اولسون دوباره
کرب و بلاده قبریوه مهمان حسینیم
- جمعه
- 8
- مرداد
- 1400
- ساعت
- 11:45
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه