چوخ دییَردیم کاش اولیدیم قبریوه زوار حسین
حق یتیشدی دادیمه اقبالیم اولدی یار حسین
حمدلله کام دل حاصل اولوبدور زینبه
ئولمدیم آخر یتیشدیم بو مکاندا مطلبه
سن یتیشدون مقصده تا روز عاشورا حسین
سندن آیرلدی بو چولده زینبون اما حسین
قیزلاری دشمن ووراندا سسلنردیم یا حسین
چوخ بلالر زینبه گلدی بو یوللاردا حسین
باخ باجون ئولسون قالوب آثاری قوللاردا حسین
آیریلاندا کربلادن اولدی بیر طوفان بیزه
عاقبت اولدی نگهبان شمر بی ایمان بیزه
ناقیه قیزلار میننده ظلم اولوب هر آن بیزه
قیزلاری بیر بیر طنابه باغلادی شمر دنی
تا دئدیم انجتمیون زنجیریلن ووردی منی
ائتمرم شِکوَه نه چون یازمیشدی حق تقدیریمی
ساخلادیم گوز اوسته قارداش ناقه ده زنجیریمی
گورمدی بیر کس ولیکن ناله دلگیریمی
رشته امیدیمی تکجه خدایه باغلادیم
آند اولا زهرایه من یوللاردا گیزلین آغلادیم
کوفه ده اما حسین اولدی قیامت بیزلره
بی حیالر ال چالوب ائتدی شمادت بیزلره
اولمامیشدی هیچ زمان بیله جسارت بیزلره
اهلبیت عصمتی قارداش پریشان ائتدیلر
قیزلاری بیر آیری عنوانیله گریان ائتدیلر
ناگهان گوردوم باشون قرآن اوخور ای شاه دین
من حزین صوتیله سسلندیم او دم بیر یاحسین
تازه یاره من باشوندا گوردوم اولدوم دلغمین
زینبون ئولسون او دم توکدوم یوزه گوزیاشیمی
طاقتیم الدن گئدوب یاردیم حسین اوز باشیمی
کوچه بازاری دولاندوخ تا یتوب وقت اذان
راهی اولدی مجلس ابن زیاده کاروان
گورممیشدیم بیر ایله مجلس اولا من هیچ زمان
هم امیر کوفه هم شیخ و اراذل جمعیدی
قیزلارون پروانه ، زینب مجلس ایچره شمعیدی
من خجالتدن حسین سالدیم اشاقه باشیمی
سسلدیم امدادیمه قولسوز یاتان قارداشیمی
کیمسه داده گلمدی توکدوم یوزه گوزیاشیمی
نیت پستین او ظالم مجلس ایچره بولدوروب
آچدی نحس آغزین دئدی الله حسینی ئولدوروب
لعنت حق من دئدیم گلسون سنه ، سلطانیوه
بیله مغرور اولما ظالم دنیوی عنوانیوه
اوز الونله ووردون آتش دینوه ایمانیوه
فخریدور آل للهه بو نوعیله مرگ و ممات
ئولمیوب ئولمز وئرن قانیله اسلامه حیات
حشره تک قارداشیمون بو انقلابی زنده دور
واردی تا زینب بولون دین پرچمی پاینده دور
شاه دیندور قارداشیم سننَن امیر ون بنده دی
یوخ بصیرت سنده ظالم دین چراغی سونمیوب
ئولمیوب زینب هله راه حسیندن دونمیوب
ایلدی اظهار کیمسن بو شجاعت سنده وار
اولماز عورته بو شخصیّت نجابت سنده وار
قوخموسان مندن دئدی هانسی صلابت سنده وار؟
من دئدیم زینب دور آدیم مرتضا دلبندیم
دختر طاها بتولین باوفا فرزندیم
روز ازّل وئرمیشم قارداشیمیلن ال اله
قویمیاخ دوشسون بو دینون بیرقی الدن اله
نطقمیله ایمدی ساللام بو مکانه ولوله
گلشن پیغمبرین دوزدی سولان بیر یاسیم
زینبم اما حسینون دومین عباسیم
من شهامت درسینی زهرا آنامدان آلمیشام
دوزدی باشه دورت یاشیمدان قاره معجر سالمیشام
سن خیال ائتمه بو مجلیسده آدامسیز قالمیشام
آل سفیانون اگر چه بیر دغل باز شاهی وار
زینبونده اوچ یاشیندا نازلی خاطر خواهی وار
افتخار ائتمه حسینون گِتدی الدن عزتی
قوللاری باغلی اسیر اولدی عیال و عترتی
غافل اولما ، باشلانوب تازه حسینون نهضتی
گئت دئنن هند اوغلی بولسون عاقبت بو مطلبی
نهضت کرب و بلانون وار حسین تک زینبی
تا قوتولدی کوفه نون قارداش مصیبت نامه سی
زینبون آز قالدی داشسین صبریلی پیمانه سی
وارد اولدوخ شامه باشلاندی بویوک هنگامه سی
نُه فلک یاندی یارالی باجیوین اقبالینه
ال چالان عورت اوشاقلار گلدی استقبالیه
آند اولا اللهه گلدیم جانه ظلم شامدن
گور نَلر اولدی قدم آتدوقجا هر بیر گامدن
باشلارا اود توکدولر هر کوچه لرده بامدن
یاندی سجادین باشی اوج ائتدی عرشه ظلم شام
عرض ائدوب الله منی ای کاش دوغمیدی آنام
اوچ نچه ساعت حسین دروازه ساعاتیده
گئچدی مین ایل لحظه سی اوردا قالان اوقاتیده
اجنبی لرده حسین گلدی او گون شاماتیده
شام امیری مجلس شادی ائدوب قارداش بپا
قوللاری باغلی عیالون ایلدی داد و نوا
وارد اولدخ مجلسه ، مجلس نه مجلس یا حسین
سسلنوبلر خارجی گلدی اولوب غوغا حسین
بیر زمان گوردوم دولاندی باشیمه دنیا حسین
مست اولوب اول حاکم ظالم توکوب گوز یاشیوی
خیزرانیله ووروب طشت طلاده باشیوی
سن اوزون گوردون او مجلسده دانیشدوم من عیان
چوخ شجاعتله اودم حق سوزلری ائتدیم بیان
خواب غفلتدن دئدیم ای حاکم ظالم اویان
شامل اولدی لطف حق یخدیم او ظالم خانه سین
زهره دوندردوم الینده ایچدوقی پیمانه سین
من دئدیم گر قوخموسان حیّ توانادن یزید
گل اوتان شیر خدادن یا که طاهادن یزید
شرم ایله باری یانان درگاهی زهرادن یزید
بو دوداقلار که وورورسان خیزرانیلن الان
حضرت زهرا اونی بسلردی جانیلن دایان
چوخ دئدیم ظاهرده اولدی گرچه اول ظالم غمین
لیک ائتدی زینبی بو باره دن چوخ شرمگین
وئردی بیر مسکن بیزه آدی خرابه ، اول لعین
بیر گجه گلدون اوزون گوردون او غملی مسکنی
عاقبت اولدی او ویرانه رقیه مدفنی
چوخ گوزل طرزیله « شیدا » نظمه چکدون مطلبی
شعریوین معلوم اولار محشرده شان و منصبی
اربعینه آز قالور وئر آند حسینه ، زینبی
عرض ایله چوخ گویلوم ایستیر لایق دیدار اولام
مهلت آل دست اجلدن قبرینه زوّار اولام
- جمعه
- 8
- مرداد
- 1400
- ساعت
- 12:10
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه