باشلورام اوّلده بسم الله رب العالمین
تا اوزی دوتسون الیمدن رحمه للعالمین
خامه یازسون بوسوزی حظ ایلسون اهل یقین
عرش و فرشی خلق ائدندن خالق جان آفرین
قویمیوب حجت سیز اولسون هیچ زمان روی زمین
عرش اعلاده یازوبدور لوحینه حیّ مبین
آند اولا اللهه حیدردور امیر المومنین
ساخلیوب تا کاروانی خُمدا ختم المُرسلین
جمع اولوب اول چولده انصار و گروه متقین
وحی اولوب پیغمبره ، عرض ائتدی جِبریلِ امین
حق بویوردی قیل بیان بو مطلبی ای مه جبین
دوت علینون بیر الین قوزا گویه ای شاه دین
تا دئدی « مَن کنت مولا» شاه یوم واپسین
عرض ائدوب «بخِ لَکَ » گوردی علینی ، کیم به عین
آند اولا اللهه حیدردور امیر المومنین
اول شب ِ معراجیده پیغمبرِ کون و مکان
سویلوری جِبریلیلن عرشه طرف اولدوم روان
دوردومینجی گویده سس گلدی منه گویا دایان
مین نئچه محراب و مسجد ظاهر اولدی بیر زمان
هر بیرینده گورسنور گوردم نئچه منبر عیان
اول منابرده اوتورمیشدی امیر مومنان
سسلوری گوردم منه صدمرحبا و آفرین
آند اولا اللهه حیدردور امیر المومنین
هر نه یازسام مرتضانین وصفینه اولماز روا
تکجه پیغمبر بو عالمده ائدوب حقین ادا
سویلوری معراجیده منلن دانیشدی تا خدا
فکریمه گلدی علیدور صحبت ایلور بر ملا
بیرده گوردوم چیخدی بیر الده منه ال وئردی تا
بحر حیرتده نه گوردوم سسلنور صاحب صدا
من خدایم ای اولان شیر خدایه همنشین
آند اولا اللهه حیدردور امیر المومنین
قوی سوزی واضح دییوم ای شیعهء آل علی
راوی پیغمبردی سویلور عرشیده رب جلی
ائتدی فرمایش که ای مصداق حقّه اَوّلی
اوز وجودیمدن من ائتدیم مرتضانی منجلی
گئت دئنن حُبّی ، جهنمدن خلاص اولدی ، بلی
کیم اورکدن سسلسه عمرونده بیر یول ، یاعلی
قویمارام محشرده اولسون امت ایچره شرمگین
آند اولا اللهه حیدردور امیر المومنین
جنگ خندقده نمایان اولدی عمرِ عبدُوَد
نیزه و شمشیرو فنِ رزمه آگاه و بَلَد
هتکِ حرمت ایلدی اسلامه اول ناکس ولد
مرتضی آیرلدی صفدن ایستدی حقدن مدد
سویلدی اللهُ اکبر یا حمید و یا صمد
ذوالفقار الده دئدی تا قل هو الله احد
ووردی بیر ضربت باشیندان جوت بولوندی اول لعین
آند اولا اللهه حیدردور امیر المومنین
عرصه ئ خیبرده اولدی مرحبیلن روبه رو
رسمیدور چون جنگیده ، اوّلده ائتدی گفتگو
من دئدی شیر خدایم آگه اول ای پست رو
آدیمی ذکر ائتمیوب هرگز پیمبر بی وضو
سنده گئت اوز جدّیوی ایله آناندان جستجو
تا دئسون کیمسن اَلا ای روبهِ درنده خو
گئت دئدی ئولدورمرم اولما ملول و دلغمین
آند اولا اللهه حیدردور امیر المومنین
آچدی نحس آغزین او ظالم باشلادی بیجا سُخَن
گل وئروم شمشیریلن تا پاسخ دندان شکن
زوریمی میدانیده گوسترم ایمدی من عَلَن
چوخ دئمه شیر خدایم شاه افلاک و زَمَن
سنده چک شمشیری منده ، تا گوراخ کیمدی ئولَن
ناگهان باشلاندی خیبر ایچره جنگ تن به تن
بیر اشاره ائیله ائتدی مرحبی دوزخ نشین
آند اولا اللهه حیدردور امیر المومنین
بس که الله چوخ سووَردی مرتضانین هیبتین
وئردی اوغلی مجتبایه عزتیلن ، شوکتین
دویمادی بیرده حسینده خلق ائدوب شخصیّتین
لیک عباسه وئرنده اوز آتاسی غیرتین
گوردی چوخ بنزور ، علمداره قویوبدور منتین
لطف ائدوب بیرده چوخاتدی قوللاریندا قدرتین
هر بیری اولدی امیر المومنینه نور عین
آند اولا اللهه حیدردور امیر المومنین
آی گئچوب ایللر دولاندی قانه باتدی مرتضا
حیف اولا اول جمعیدن آیرلدی بیرده مجتبا
گلدی دشت کربلایه خامس آل عبا
بیرده عباس اول علمدار شه کرب و بلا
یوم عاشورا یتیشدی اولدی محشر بر ملا
قالمادی انصار شاه کربلادن مطلقا
بیر حسین قالدی بیر عباس رشید و مه جبین
آند اولا اللهه حیدر دور امیر المومنین
گوردی عباس دلاور قارداشی قالموش وحید
ایلدی اوز شاهینه تعظیم علمدار رشید
عرض ائدوب قارداش اولوبدور یار و انصارون شهید
گل سنی زهرا منی ائتمه بو چولده نا امید
دوزمرم هرگز بوگون قوم ستمکار و پلید
سسلسون دینه امیر اولموش زنازاده یزید
قوم گئدوم جنگه دییوم کیمدور اولان دینه مّعین
آند اولا اللهه حیدر دور امیر المومنین
شاه دین گوردی علمدارینده یوخ صبر وقرار
سسلدی ای مرتضادن بو حسینه یادگار
خیمه لرده قیزلاریم اولموش عطشدن بیقرار
لیک ائتدیم من سنه نهر فراتی واگذار
بیرده ممکن اولسه سو تحصیل ایله ای باوقار
گئت سنی اللهه تاپشوردوم بوگون ای گلعذار
گوزله جنگ ائتمه ، اگر ائتسن چتین دوتما گئچین
آند اولا اللهه حیدردور امیر المومنین
تا آلوب رخصت دایاندی با تمام اقتدار
نیزه و شمشیری الده مرکبه اولدی سوار
خیمه لردن آیرلوب تا اول جوان جان نثار
مرکز میداندا دوردی همچو کوه استوار
سسلدی اولسون سیزه ای کوفه اهلی ننگ و عار
گو کیمیلن گلموسوز جنگه ائدرسوز افتخار
زاده ء زهرادی ،ای لشکر، گوزل آدی حسین
آند اولا اللهه حیدر دور امیر المومنین
بو حسینی که سوسوز ئولدورموسوز اعوانینین
باغلیوب روز ازلدن حقیلن پیمانینی
تا وئره اسلام و قرانه فدا اوز جانینی
منده عباسم بو چولده دوتموشام دامانینی
جانیمی وئرم ولی حفظ ایلرم شه جانینی
بیرده بو نوکرلقین زهرا جانی بیر آنینی
وئرمرم عالملرین وئرسز منه سیم و زرین
آند اولا اللهه حیدر دور امیر المومنین
گوردی عباس اعتنا ائتمور گروه کوفیان
غیرتیندن یوز قیزاردی گوزلر اولدی بحر قان
دوتدی بیر الده سپر بیر الده شمشیر و سنان
لشکره حمله ائدوب اول دمده چون شیر ژیان
مرکز میدانیدن اول دم اوجالدی الامان
لشکرین پوزدی نظامیان توکدی چون برگ خزان
جنگ ائدنده سسلنردی زاده ام البنین
آند اولا اللهه حیدر دور امیر المومنین
سسلنوب الله اکبر یرلر ائتدی زلزله
سالدی میدانه علی اوغلی بیر آیری ولوله
هر شکاری شیر تک صید ایلیوب آلدی اَله
کاهِ خرمن تک آیردی باشینی وئردی یِلَه
خیمه لردن جان فدا سسلندی زینب بو یَلَه
چوخ چتین بیرده دئدی مثلی بو دنیایه گله
دوغمیوب روز ازلدن هیچ آنا دوغماز یقین
آند اولا اللهه حیدر دور امیر المومنین
اولدی عباسه مقابل مارد آدلی پهلوان
جنگیلرده تاپمیشدی شهرت و نام و نشان
گوردی مرکب اوسته دورموش بیر جوان جانفشان
سسلدی ال چک جَدَلدن تا وئروم منده امان
فرض ائدورسن عرصه جنگی دبستان سن گمان
گئت منیلن زوریوی میداندا ائتمه امتحان
ایلدی عباسی اول ظالم بو سوزده خشمگین
آند اولا اللهه حیدر دور امیر المومنین
تا ائشیتدی بو سوزی فرزند شیر ذوالجلال
سسلدی اول بی حیایه ای سگ کینه خصال
پهلوانه بولموسن اولماز مگر جای مقال
قدرتون واردور اگر ، گل تا وئروم منده مجال
آل اله شمشیریوی لال اول ایله جنگ و جدال
فرق میدان و دبستانی دییوم تا ای شغال
ایلیوم دوزخده نیرانه سنی ایمدی قرین
آند اولا اللهه حیدردور امیر المومنین
گوردولر باشلاندی دشت کربلاده کارزار
دولدوروب اول عرصه نی بیر لحظه ده گردوغبار
شیر تک اول روبهه عباس ائدوب نیمه نظار
حیدر کرار تک آلدی اله تا ذوالفقار
مرکب اوستن اوج ائدوب بیرآنیده شهباز وار
ماردین بیر ضربتیله عمرین ائتدی تارو مار
عرشیدن عباسه احسن سسلدی روح الامین
آند اولا اللهه حیدر دور امیر المومنین
جنگ عباسه باخاندا عرشیدن کروبیّان
گوئیا تسبیحیدن اول دم چکوب ال قدسیان
عرض ائدوبلر مرتضایه ای امیر انس و جان
بیر نظر قیل کربلایه شیرون عباس ژیان
ایلوری اوغلون حسینه گور ننوعی بذل جان
اولمیوبدور بدو خلقتدن بو دعوا هیچ زمان
باشلاری کسدوقجا سسلور ای گروه مشرکین
آند اولا اللهه حیدردور امیر المومنین
ایستدی تا استعانت حجت ِ داداریدن
اولمادی قدرت مقابلده دورا اشراریدن
اول قَدَر جنگ ایلدی ئولدوردی تا کفاریدن
دولدورب میدانی نعش کرکس و کفتاریدن
آلدی اکبر انتقامین منقذِ بیعاریدن
پاک ائدوب اطراف نهری قوم استکباریدن
دولدوروب مشکین چیخوبدور نهردن اول یار دین
آند اولا اللهه حیدردور امیر المومنین
بولمورم نه گلدی عباسه نچه ساعت صورا
دوشدی مرکبدن ولیکن باش یارا یوز گوز یارا
دوتدی یوز اخیامه ساری اول جوان با وفا
سسلدی داده حسینی گل هرایه یا اخا
مشکیم اوخلاندی ، بدندن قوللاریم اولدی جدا
بیرده یول اوسته منه ظلم ایلدی بیر بی حیا
ووردی باشیمدن او ظالم بیر عمود آهنین
آند اولا اللهه حیدردور امیر المومنین
حق عنایت ایلدی « شیدا »یه بو سوزده یقین
ایستمیشدی چون ، پیمبر لطف ائدوب دوتدی الین
سوزلری دفترده خامه ، دوزدی چون دُرّ ثمین
رسمیدور چون شاه مایوس ایلمز اوز نوکرین
یوز دوتوب درگاهوزه اولموش ایشی داد و انین
وار اورکده آرزوسی یابن میر المومنین
ایسته بو جمعیله گلسون کربلاده سسلسین
آند اولا اللهه حیدردور امیر المومنین
- جمعه
- 8
- مرداد
- 1400
- ساعت
- 12:16
- نوشته شده توسط
- یوسف اکبری
- شاعر:
-
محمدرضا صادقی
ارسال دیدگاه