قالمشام بوقـورخولی چولده هــراسانم بی بی
هـارداسان ســسلور رقیــون زار ونالانم بی بی
اوچ یاشیندابیرقیزام بوردا وحیدو بیکسم
واریری یاپراق مثالی قورخودان ایمدی اسم
ظلمت شبده مالیمدن زبس دل واپسم
شبنم اشگــیم اودور جاریــدی گــریانم بی بی
بودل شبده فغـانیم اوج ائدوبدی گوگلره
سالدی آتش سربه سرارض وسماده دللره
چاتموری نیلوم الیــم ایمدی وفالی ائللره
خوفیدن گلموردیزیم افتــان و خیــزانم بی بی
قاچمشام بسکه بوماواده پیاده صاق صولا
آزقالوبدور گلشن عمرون گلی عمه سولا
یوخدی بیرکیمسه یانیمدا باری غمخواریم اولا
هجــریدن بلکه گــوریدی قلبی سوزانم بی بی
بیریتیمم بوبیــاباندا غریب و باغـــریقان
نه آتام نه قارداشیم وارغم آلوب مندن توان
کسمه باشیمدان عنایت سایه سین ای عمه جان
تیــرمحنتدن بلــورسن قلبی شان شانم بی بی
دست تقدیر آلدی مندن ظلم الیله چاره می
قانه دوندردی دوباره بودل صد پاره می
معجریله باغلادیم ایمدی ایاقدا یاره می
اشــگ ریز محنت خار مغیـــــلانم بی بی
سسلیوردوم غملی صحراده سنی فریادیمه
لشگرغم سایه سالمیشدی دل ناشادیمه
گلدی جنتدن یتشدی فاطمه امدادیمه
گوردی بحرابتلاده غرق طوفانم بی بی
چوخ گوگل آلچاقلق ایتدی حضرت زهرا آنام
شامل ایتدی حالیمه لطفون اومرضیه مرام
قویمادی مایوس وسرگردان بوصحراده قالام
واقفیدی مستحق لطف واحسانم بی بی
عالم معنـــاده گـــویا ناظـــریدی حالیمه
چشم حق بینی باخوردی غصه لی اقبالیمه
آلدی آغوشه آنام یاندی منیم احوالیمه
لطفونه احسانینه دیلدن ثناخوانم بی بی
پاک ائدوب رخساریمون گردوغبارین آغلادی
گوردی سیلی ردینی اشگین عذاره باغلادی
یوز یوزه قــویدی منیله کائنــاتی داغلادی
گل آنام زهرا لبیندن بوسه بارانم بی بی
گاه اوپردی گـوزلریمدن گه دیردی جان بالا
دیده وه زجرین جفاسیندن دولوبدورقان بالا
قامتی غمدن کمان زهرا سنه قربان بالا
حشراولونجا عشقینه مبهـوت وحیرانم بی بی
هرکیمه بیرپای ویروبدورروزاول ذوالجلال
قویمابیهـوده چخاالدن(جـوانی)بومجال
یازرقیــه غملــرین ایله بوطــرزیله مقــال
قالمشام بوقـورخولی چولـده هـراسانم بی بی
- یکشنبه
- 10
- مرداد
- 1400
- ساعت
- 14:25
- نوشته شده توسط
- یوسف اکبری
- شاعر:
-
موسی جوانی تبریزی
ارسال دیدگاه