ای حسینه باش یاران زینب سلام اولسون سنه
بو گوزل رسمی قویان زینب سلام اولسون سنه
ای خانم باش یارماقا فتوا ویروبسن سن بیزه
هر قدر طعنه ویرا یوخ عیبی هر دشمن بیزه
سن کیمی استادیدن قالمیش بو درس فن بیزه
ویروق هر ایل امتحان زینب سلام اولسون سنه
هر کسی که ادعا ایلور حسینه عاشقم
ثابت ایتسون عشقینی یعنی که مولا صادقم
باش یاروب زینب مثالی سویله سون که لایقم
ای مراد عاشقان زینب سلام اولسون سنه
یاده سالام کوفه ده بیر باش گزوردی نیزه ده
آت قدم آتدوقیجاق قالخوب انوردی نیزه ده
صوتیلن قرآن دین لبلر اسوردی نیزه ده
گوردی باشی باغریقان زینب سلام اولسون سنه
هر قدر قارداشه باخدی حسرتیلن دویمادی
ایستدی درد دیلین ابراز ایده وقت اولمادی
آتدی بیرداش ناگهان عفریته عورت قویمادی
بی حیادی میزبان زینب سلام اولسون سنه
نیزه دوشدی لرزیه داش دیجگین باش نیلیه ؟
شدتیندن کول توکولدی لعنت اولسون خولیه
آغزینا داشلان ویرالار حق سوز هر کیم سویلیه
کسدی نطقین کوفیان زینب سلام اولسون سنه
گورجگین بو حالی باجی آز قالوب چیخسون جانی
سسلدی لبیک حسین جوش ایلدی غیرت قانی
ویردی باشین محمله باخ مدعی عشقی تانی
یاردی باشین قهرمان زینب سلام اولسون سنه
باشوی عشقیله یاردون ای خانیم من دوزمرم
چکمرم ال بو عملدن واردی تا جان چکمرم
باخماسون اما منه غملی گوزولن نیلرم
دردمندم مهربان زینب سلام اولسون سنه
خنجریم الده قلمدور کاسه ی سر دفتریم
بیر رجز انشا ایدیم زهرا قیزی اول داوریم
هر ایکی دنیا فقط مولا حسیندور رهبریم
بو مرامیمدور عیان زینب سلام اولسون سنه
- دوشنبه
- 11
- مرداد
- 1400
- ساعت
- 17:25
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه