دوشدی حسین ترابه جسمی یارالی، زینب
سال باشه قاره معجر اولدون عزالی زینب
مظلوم حسین حسین جان
جانیم حسینه قربان
دوشدی حسین یوز اوسته صحرای کربلاده
زینب دئدی حسین وای عالم گلوبدی داده
هی سسلیور چکون ال ای قوم بی اراده
زهرا بالاسیدی بو منده حیالی زینب
بلبل ئولر آرالی دوشسه الهی گلدن
از بس دیوبدی یاره مولا دوشوبدی دیلدن
قاتل گلوب او لحظه خنجر چکوبدی بئلدن
بیلمم نه واردی شمرون باشدا خیالی زینب
قان دوتموشیدی شمرون اول گوزلرین خدایا
فکر عمارت ری واردی باشیندا اما
زینب دئدی وئریبسن بو تشنیه سو آیا؟
وئرمدیلر حسینه آب زلالی زینب
گوگلر بوتون دوتولدی وحشتلی یئلر اسدی
خنجرله شمر ، حسینون دالدان باشینی کسدی
زهرا دئدی بالامی اینجیتمیون دا بسدی
لب تشنه دی شهیدیم گللر مثالی، زینب
کسدی باشی او ملعون گویلر دئدی حسین وای
دیللر غمیله دولدی کافر دئدی حسین وای
ال باشدا پا پیاده خواهر دئدی حسین وای
باخ باشین اوسته اولموش قدی هلالی زینب
زینب هی اوخشیوردی باش سیز قالان حسینیم
ای زینبون باشینا قاره سالان حسینیم
ئولسون باجون یوخوندی لای لای چالان حسینیم
تا جان وئرنجه اولدی آه و نوالی زینب
گل پیکرون داغیتمیش آتلار ایاقی قارداش
یوخدی باشون ئوپم من اول گل یاناقی قارداش
هاردا دئی ئولدورلر تشنه قوناقی قارداش ؟
دوشدی داخی حسیندن ای وای ارالی زینب
گون باتسا آی ،دوتولسا ،اولدوز آخار حسینجان
آه و فغان بو غملی دیلدن چیخار حسینجان
صد پاره پیکریوه زینب باخار حسینجان
زهرا دئیر باتوبدی قانه جمالی زینب
یوخ یئر ئوپم، سینونده از بس که یاره واردی
باشیمده بش یاشیمدان واللهی قاره واردی
هر درده ای "خدایی" دنیاده چاره واردی
یوخ چاره سی جهاندا قارداش ملالی زینب
- دوشنبه
- 11
- مرداد
- 1400
- ساعت
- 17:30
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه