مین جان شیرین گر تاپام قربان حسینه ایلرم
هم جانیمی ،هم مالیمی احسان حسینه ایلرم
من نوکرم ، ارباب حسین ،خوشدور منه بیر کلمه سی
کرب و بلاده عاشقین مهمان حسینه ایلرم
آقام حسیندی ای بشر گلمز مثالی هیچ زمان
بو دیده می هربیر زمان گریان حسینه ایلرم
دردیمی سینمده آقام من ساخلادیم هیچ آغلامام
هر دردیمی تحریر ائدوب دیوان حسینه ایلرم
بزم عزاسینده فقط گوز یاشیمی نذر ائتمیشم
گوزیاشیله صحرالری عمان حسینه ایلرم
چوخ دیلره سالمیش اگر بیر عده ئوز معشوقه سین
من یوسف کنعانیده حیران حسینه ایلرم
فکر ائتمه باغلی قولاریم اصلا آچیلماز بندیدن
اذن اولسا قانه دشمنی غلطان حسینه ایلرم
کرب و بلایه داعشی وار جرئتی بیر چپ باخا
سوگند حسینون جانینه طوفان حسینه ایلرم
سید علی فرمان وئره مین عاشقین واردی آقا
کل عراقی واللهی ایران حسینه ایلرم
شان و مقامین یاحسین من ایلورم تکثیر آقا
حتی یهودی تابع قران ، حسینه ایلرم
بیچاره دور والله آقا بو شاعرون ائت بیر نظر
سسلور 'خدایی" جانیمی قربان حسینه ایلرم
- شنبه
- 16
- مرداد
- 1400
- ساعت
- 12:41
- نوشته شده توسط
- یوسف اکبری
- شاعر:
-
حسین خدایی زنجانی
ارسال دیدگاه