شیعه لرآماده اولسون فصل ماتم باشلانور
گرم اولور عشق آل ویری یعنی محَرَم باشلانور
مشتری هرکیمدی گلسون عشق دانشگاهینه
نقد جان الده گتورسون زینبون درگاهینه
کربلا جنّتدی آند اولسون ربابون آهنینه
فصل تَکریم شهیدان مُعَظّم باشلانور
شعر حُریّت اوخور هر بنده که آزاده دی
جوش ایدن قانلار محبّت ساغرینده باده دی
عشق اودیندا یانماقا پروانه لَر آماد دی
جسم بی جانلار، مَسیحادن آلا دَم باشلانور
جاودان نعمتدی ذکر یاحسین انسانلارا
عشق ممتازی اونون فرمانروادور جانلارا
بیز حسینون مستیوک، آمادیوک طوفانلارا
لطف حقدن احتزاز قاره پرچم باشلانور
گوز یُومار صرّاف لر، یاقوتیدن اَلماسیدن
سینه لر آئینه تک تصویرآچار احساسیدن
آز قالور دوتسون حَرَملَر دامن عباسیدن
قصۀ لب تشنگانِ نَهر عَلقَم باشلانور
نینوا بیر یردی اوردا نقدجان سُوداسی وار
نیمۀ شَبدَه، حسین وساربان سُوداسی وار
غارت اخیام وار، تیر و کمان سُوداسی وار
اصغرون اوخلانماقی، قول باغلی کَم کَم باشلانور
آزقالور دست حسین دامان دلبر دوتماقا
آزقالور یتمش ایکی باشسزبَدَن پَردوتماقا
آز قالور زهرا قیزی مقتلده خَنجَر دوتماقا
ای حسینچی، باغلا اِحرام عَزا، غَم باشلانور
- چهارشنبه
- ۲۰
- مرداد
- ۱۴۰۰
- ساعت
- ۲۱:۴۲
- نوشته شده توسط
- یوسف اکبری
- شاعر:
-
سید تقی سیفی اردبیلی
ارسال دیدگاه