ضربتلنوب باشدان آتام حیدر یارالاندی
قارداش حسن گل ساقی کوثر یارالاندی
قتل العلی سسلور هامی اولموش بپا محشر
آغلور ملکلر نه فلک گیمیش قرا یکسر
قلبیم ایوین غم چولقویوب ای سبط پیغمبر
دینه مروج عالمه سرور یارالاندی
ای کهکشانلار فیض آلان نور جمالوندان
ای مهربانلار اورگدن حسن کمالوندان
ای خلق عالم دویمویان قال و مقالوندان
یاتما اویان دور فاتح خیبر یارالاندی
محراب طاعتده قلج لاندی نماز اوسته
باش پارچالاندی حقیلن راز و نیاز اوسته
دوشدی امام کون و امکان جانماز اوسته
مسند نشین مسجد و منبر یارالاندی
ابر محندن غم یاغور قلبیم دولوب قارداش
باغ ولایتده آچان غنچه م سولوب قارداش
لرزاندی یر گوگ تترشور دور گور نه اولوب قارداش
عرشه ستون ارضه اولان لنگر یارالاندی
بیر ظلم ایدیبدور زادهء ملجم بوگون دینه
اندوردی قرآن ناطقین اود سالدی کونینه
قلبیم یانور گللم او دور من شیون و شینه
اغیار الینده یار غم پرور یارالاندی
من زینبم جان نقدینه غم ناقه سین آلدیم
اول چاتیب هجران یوکین صوندان یولا سالدیم
چرخ قضا یول باغلادی ال سینه ده قالدیم
آتدی قدر اوخ سینمه یکسر یارالاندی
زهرا ننه م گیتدی قالوب غملر من زاره
ای وای منه بش سنّدن اگنیمده وار قاره
غم یولداشین گورماخلقا گلسیدی دیداره
اوندا دیردیم یار پیغمبر یارالاندی
یرلر اولوب ماتم سرا گوگلرده غوغا دور
نوریله ظلمت بیر بیرین پیلور نه دعوادور
رکن عدالت پیلنوب امروز و فردا دور
دوشسین همای معدلت شهپر یارالاندی
یر دن نوا قالخور گوگه گوگدن گلور ناله
یکسر دوتوب آفاقی غم آغلور بو احواله
غم لشگری شهرین کنارینده چکوب هاله
بسدور''"امینی''"شاه عالملر یارالاندی
- جمعه
- 22
- مرداد
- 1400
- ساعت
- 11:46
- نوشته شده توسط
- یوسف اکبری
ارسال دیدگاه