دلا دنیا علی سیز درده دگمز
که هیچ سودا علی سیز درده دگمز
نه ایش گورسن ایشونده یا علی ده
و الا یا علی سیز درده دگمز
علی لنگردی فرشه عرشه پایه
علی محوردی کل ماسوایه
علی سالمش سراسر کونه سایه
علی شأنینده قرآن آیه آیه
وروب توضیح ختم الانبیایه
یتورسین جمله سلطان و گدایه
گلون ملحق اولون اهل ولایه
ولایتده چاتارسیز انتهایه
بشر اوج ایلسه عرش خدایه
خدایا یا علی سیز درده دگمز
علی دور آدمیت جسمینه جان
علی دور جاودان جانلاردا هر آن
علی دور حجت برحق یزدان
علی دور رگلرونده سیر ایدن قان
جهان آفرینش ده نگهبان
خدا اونلان وروبدور کونه امکان
او قورتاردی خلیل اللهی اوددان
آدین ذکر ایتدی اولدی اود گلستان
صراحتلن بیان ایلوبدی قرآن
کیم اولسا یا علی سیز درده دگمز
علی دور قاف حریت هماسی
علی دور جمله خلقین رهنماسی
علی دور عالمین صلح و صفاسی
علی دور هر زمانین ابتداسی
اودور لقمانلارین مطلق آقاسی
اونون چخسا لبیندن بیر دعاسی
گیچر الله یانیندا التماسی
قبول ایلر دعاسین اوز خداسی
ابو طالب علی نین اوز آتاسی
گر اولسا یا علی سیز درده دگمز
- جمعه
- 22
- مرداد
- 1400
- ساعت
- 12:23
- نوشته شده توسط
- یوسف اکبری
ارسال دیدگاه