ماه عزا ماه محرم گلور
قلبلره غصه گلور غم گلور
ور خبر ای باد صبا ایللره
شیعه لره موسم ماتم گلور
ماه محرم گلور
زادهٔ مرجانه گوروم عار اولا
لعن حقه روحی گرفتار اولا
سهمی جهنمده اونون نار اولا
دین ایوین ایتماخلقا بر هم گلور
ماه محرم گلور
کرب و بلا دشتینه طوفان گلور
هر نه گلور واله و حیران گلور
قافلهٔ شاه شهیدان گلور
نوح گلور عیسی مریم گلور
ماه محرم گلور
لرزیه ای شیعه فلکلر گلور
ناله و افغانه ملکلر گلور
درد و غمه جمله اورکلر گلور
دللره غم دیده لره غم گلور
ماه محرم گلور
باشلانیر ایام عزای حسین
روضه و مرثیه سرای حسین
آغلیاقون بیزده برای حسین
روضه سینه آدم و خاتم گلور
ماه محرم گلور
بیزده گلون باشه قرا باغلیاخ
سینه ویراخ سینه لری داغلیاخ
نوحه دیاخ ناله ایدوب آغلیاخ
آغلاماقا اهل دو عالم گلور
ماه محرم گلور
لعن خدا شمر ستم پروره
ظلم و جفا ایلدی پیغمبره
لرزه سالیب گوگلره هم یرلره
اهل سما فرشه مسلم گلور
ماه محرم گلور
ماه محرمده اولوبدور عیان
ظلم یزید عالمه ای شیعیان
زینب مظلومه نی آغلار قویان
لشگر خونخوار دمادم گلور
ماه محرم گلور
کیم اولور آماده حسین یاسینه
بسته دی هر کیمسه نین احسانینه
شیعه لرین حضرت عباسینه
دردیوی ده صاحب پرچم گلور
ماه محرم گلور
ماه محرم ده سویون یولارین
باغلادیلار صاقلارین هم صولارین
سالدیلار عباسین اوزون قولارین
آغلاسا هر کیم اونا مرهم گلور
ماه محرم گلور
ماه محرم ده یاغیب قان یره
نقش اولونوب جسم شهیدان یره
سانکه دوشوب آیهٔ قرآن یره
خدمتینه حضرت آدم گلور
ماه محرم گلور
سنده "امینی" یوزه اشکون اَله
عالمه قوی روشن اولا مسئله
شاه شهیدان یخیلان مقتله
قامتنی زینب ایدوب خم گلور
ماه محرم گلور
- جمعه
- 22
- مرداد
- 1400
- ساعت
- 18:22
- نوشته شده توسط
- یوسف اکبری
ارسال دیدگاه