گینه بیر گل گلستان ولایت ده خزان اولدی
او گلشن ده گَزن بلبلرین ده باغری قان اولدی
صبا ای باد غم سن گیت خبر ور قوی رضا گلسین
ده اوغلون جان ورور جانانه گل دردون کلان اولدی
سموم ظلملن مسموم اولوب اوغلون جواد ای شاه
محبانین ملالین دمبدم ایلور زیاد ای شاه
امام هادیه بیر دادرس یوخ ایله یاد ای شاه
وروب الدن آتاسین شغلی آه اولدی فغان اولدی
امان اول ام فضلین ایتدیگی ظلم و جفاسیندن
امام نهمه گستردیگی مهر و وفاسیندن
گلبدور شیعه لر فریاده زهرین ماجراسیندن
جگرلر دوغرانبدور پرده پرده لخته قان اولدی
اولوب دین ناخداسی غرق بیر طوفانلی دریاده
قالیب نوح زمان طوفان ایچینده یوخ سالان یاده
سالیب طوفانلی یللر ولوله وادی بغداده
غمین اول ماجرادن قلب کل انس و جان اولدی
بو درد و محنت عظما سالبدور عالمی درده
چکنمز تا قیامت بو جفانین اوستونه پرده
هدف بولمم ندور ظلام دهر و کینه پرورده
بو قدری مخفیانه ظلم اونلاردان عیان اولدی
او مولا خلقتین گنجینه سینده درّ نابیدی
حمایت ایله سیدی هر کیم اوندان چوخ ثوابیدی
کمال اولسیدی ام الفضل ده بیر آفتابیدی
مداریندن چیخوب محو اولدی رسوای جهان اولدی
تجلاسی واریدی اول امامین بزم عرفاندا
هدایت مشعلیدی هم طریق دین و قرآن دا
ولیک ایمان و انصاف اولمادی اول نانجیباندا
گورورسن دین و قرآنه بد اولدی بدگمان اولدی
ایا ای صاحب عصر ای امام انس و جان تز گَل
گرفتار اولدی مین درد و ملاله شیعیان تز گَل
قالیب یرده حسینین قانینه یوخ قان آلان تز گَل
دولاندی قرن لر دوران گیچوب آخر زمان اولدی
شهید کربلا یتمیش بیر عاشق وردی قرآنه
اوزی مقتل ده ظلمیلن بویاندی قرمزی قانه
داغلدی قطعه قطعه گل وجودی قانلی میدانه
حسین الدی عیال و عترتی بی خانمان اولدی
قلم الده "امینی" صبح و شام ایلور فغان آغلور
آخور رخسارینه جیحون کیمی گوز یاشی قان آغلور
یازاندا غم کتابین شاعرانه هر زمان آغلور
او قدری آغلیوب آغلاتدی اوز طبعی روان اولدی
- جمعه
- 22
- مرداد
- 1400
- ساعت
- 18:42
- نوشته شده توسط
- یوسف اکبری
ارسال دیدگاه