ای گل یاسمنیم قاسم نوجوان
یادگار حسنیم قاسم نوجوان
دور بیلیم سیندی منیم قاسم نوجوان
(برگردان)
قانیوه بویانموسان اوغلوم
سسلورم اویانموسان اوغلوم
گلشن فاطمه نین با طراوت گلی
لاله زار حسنین خوش بیان بلبلی
دوغرانبدور بدنین ای منه سوگلی
ایتدیلر محشر عیان اشقیا لشگری
آلدیلار الدن امام شبهه پیغمبری
سنده ای تازه جوان اکبری مظهری
باغلیوب نقش یره گل وجودون اوغول
مین دَیَر بال و پره بیر سجودون اوغول
پیش خیرالبشره وار صعودون اوغول
خوشدی راه عشق ده امتحانون بالا
هدیه گاه عشق ده آخدی قانون بالا
جلوه گاه عشق ده چیخدی جانون بالا
وصلتین نمازینه اولدون آماده سن
قصد دستمازینه سنده شهزاده سن
قانلی جانمازینه دوشدون آزاده سن
اُف اولا چرخ فلک سیرینی ایتدی کج
بولمدی نان و نمک کوفیان گیتدی کج
دوردولار کفره کمک ختمه ایش یتدی کج
عشق ایوین ساز ایلدون عشقین اولدی ازل
گرچه پرواز ایلدون مرغ شیرین غزل
یاره مین ناز ایلدون عاشق لمیزل
خیمه ده جانه گلوب ایندی بی کس آنان
آه و افغانه گلوب آغلاشور بانوان
منده میدانه گلوب اولموشام باغریقان
سن شهید اولدون اوغول چاتموسان کامیوه
یاور سبط رسول چاتموسان کامیوه
خیردور اولما ملول چاتموسان کامیوه
ویردی اشرار دنی ظلمینن تیشه سین
پوزدولار باغ چمنی کسدیلر بیشه سین
قیردی کفار علنی قلبیمین ریشه سین
دائما آغلور "امین" ایلور آه و نوا
سینه سین داغلور امین دردینه قیل دوا
قاره وی باغلور امین ایستوری کربلا
- شنبه
- 23
- مرداد
- 1400
- ساعت
- 15:58
- نوشته شده توسط
- یوسف اکبری
ارسال دیدگاه