غم ویرانه دن ویران اولان دللر فغان ایلور
سارالمیش یوزلره گوزدن آخان سیللر فغان ایلور
خرابه منزلین توز تپراقیندان صحبتیم یوخدور
واریمدور صحبتیم شاهانه منزللر فغان ایلور
گلور آهن قفس لر گوشه سیندن ناله و فریاد
یانور بلبلر آغلور گوئيا گللر فغان ایلور
آغاشلار شاخ و برگین سیندیراندا قان دامور دامسین
ولیکن سوز بودور تن لر قالیب جیللر فغان ایلور
سیزیلتی ناله سیندن هیچ کیمه آرام جان یوخدور
دیسم بیجا دگول دریا و ساحللر فغان ایلور
سوزوم ویرانه منزل ماجراسیندن گلوب حاصل
حسین آدیله چوخ حاصل محاصللر فغان ایلور
باشیندا زینبین غم غصه لی قیزلار وریب هاله
اولار که دللری آیلار فغان ائللر فغان ایلور
جهالت خنجریندن قان دامور جهلین الی سینسین
دل دیوانه لر هم جمله عاقللر فغان ایلور
حسینین قانی بیر قان دور که الله قانی وار اوندا
فضای عشق و عرفان فعل و فاعللر فغان ایلور
"امین " آغلور یانور یاد ایلینده گنج ویرانی
اونون دردین سالاندا یاده فاضللر فغان ایلور
- شنبه
- 23
- مرداد
- 1400
- ساعت
- 16:2
- نوشته شده توسط
- یوسف اکبری
ارسال دیدگاه