سپهسالار حق مولا ابوالفضل
توانا یار حق مولا ابوالفضل
شجاعت بیشه سینده شیر ثانی
اولان پرگار حق مولا ابوالفضل
نه محکم ساخلیوب قرآن لواسین
او پرچمدار حق مولا ابوالفضل
لقبده بندهء صالح ,عملده
بیوک احرار حق مولا ابوالفضل
ایدنده عرصه گاه جنگی جولان
که اول کرار حق مولا ابوالفضل
او عریان ذوالفقارین اویناداردی
هر آن سردار حق مولا ابوالفضل
لسان الله دور مانند حیدر
شیرین گفتار حق مولا ابوالفضل
کلام منطق و گفتاری الحق
حقیقتدار حق مولا ابوالفضل
ورن زینت جمالی باغ عشقه
گل گلزار حق مولا ابوالفضل
حسین ابن علی نین غم شریکی
غمین غمخوار حق مولا ابوالفضل
دیدی من مست جام عشق یارم
می عهد الستیدن خمارم
حسین جان مشرقینین شاهی سن سن
الونجه من سنه خدمتگزارم
وفا گنجینه سینده در نابم
مهکدن چخمشام کامل عیارم
نقدر من وارام سن مطمئن اول
الیمده نقد جانیم جان نثارم
علی المرتضی تک غیرتیم وار
اودور علت که اوندان یادگارم
یرین اوستون سراسر دشمن آلسا
فنون جنگده استاد کارم
بودور فخریم که من یکتا پرستم
اوزوم رزمنده ء پروردگارم
پریشان دور ما تل اوستونده قارداش
عمل ده قول ده بااعتبارم
خیامه باغلارام نهر فراتی
نه چونکه اصغریمدن انتظارم
منه فرمان جنگی صادر ایتسون
بسیمدور اوز ایشیمده هوشیارم
فضای همتین رخشنده ماهی
ایشیقلاندیردی آفاق سیاهی
حسینین قلبینی غم چولقامیشدی
دوتولموشدی بیله عالم پناهی
هنر عنقاسی بیردن شهپر آچدی
قاریشدی بیر بیره شامین سپاهی
چکور ظلمت ایاقین عرصه گهدن
عیان ایلور اوزین نور الهی
دومان قالخور هوایه گیزلنور گون
ورنمور بیر نفر دوزگین گواهی
شاخور برق بلا عباس الیندن
دوتوب آتش هامی سنگ و گیاهی
ایاقلار داشلارین اوسته یاناردی
چخاردی باشلاریندان دود آهی
امامین قانی غیرت رگلرینده
جوشوب ترک ایتدی بیر یول خیمه گاهی
ایکی قارداش بیر اولجاق سیندی لشکر
قاچوردی جنگ ایدنلر گاه گاهی
وزیرین پنجه سیندن قورتولانلار
ایدوردی نوش جان شمشیر شاهی
ایکی غیرتلی قارداش تاپدی امکان
اوقارداش سسلینده بو دیور جان
قلجلار نیزه لر اوینور هوا ده
گیدور باشلار بویونلار دان آخور قان
دوشور آهن عمودین ضربه سیندن
بدنلر تپراق اوسته سان ورور سان
ابوالفضلین الینده ذوالفقاری
حسینین باشدا وار شاهانه قلخان
ایکی صورت ایکی شئ دن آلور باج
بیری گوندن بیری آی پارچاسیندان
گون عاشق دور آیا آی عاشق گونه
نه آی گوندن چکور ال نه گون آی دان
او سسلر مرحبا ام البنینه
بوگوتموش سن کمی قدرتلی اوغلان
بو سسلور آی بتولین یادگاری
سنی الله یارالدوب دینه ارکان
اوسسلور افتخار ایت سن ابوالفضل
بیزی جوت بسلیبدور شاه مردان
منیم چوخ فکریمه قالما بسیمدور
فقط اوز قوللاریندان صاحب اولسان
او سسلور ای امید آل یاسین
بو سسلور تاپموشام الله رضاسین
دیور ور مژده ای زهرا عزیزی
بویاندان یخمشام کفرین قواسین
موکللر قباقیمدان قاچیبلار
فراته ویرمیشام قرآن لواسین
نتیجه حاصل اولدی خدمتیمدن
سوسوزلار دردنین تاپدیم دواسین
یتورسم مشکی سالم خیمه گاهه
آزالدر قزلارون آه و نواسین
اگر یانسام سوسوزدان ایچمرم سو
گرک سیراب ایدم قارداش بالاسین
باجیم زینب منه سنگ مهک دور
عیار ایلوبدی قارداشلیق طلاسین
اوزاقدور غیرتیمدن گر سو ایچسم
تحمل ایلرم نفسین جفاسین
رضایم اوچ پر اوخ دگسین گوزومدن
آلوم اول تشنه لب اصغر قاداسین
بصیرت گوزلریمدن گوررم اوندا
سنون تک منده قارداش حق لقاسین
قلم عاجز دی یازسین وصف حالین
حسینین یا ابوالفضلین کمالین
بیری صاقدان بیری صولدان ایکیمجی
قاتوبلار وضعینی جنگ و جدالین
فضای کربلا دن قان یاغوردی
هوا آغلوب توکوردی اشک آلین
واریدی بیر مکاندا جنگلستان
گزور عباس راه انتقالین
گون اوز سمتینده هردن بویلانوردی
نظرده ساخلامیشدی اوز هلالین
نقدری دالدالا ورمیشدی آی گون
او وقت تاپموشدی ظلمت اوز زوالین
تلاش ایلوردی عباس اوز ایشینده
ربابین سود امر زیبا غزالین
اوزی سیراب قیلسین اوز الیله
تاپانموردی او خیر امرین مجالین
یولون سالموشدی نخلستان ایچیندن
که آلسین بلکه سقالیق مدالین
کمین ایتمیشدی بیر جلاد ناکس
حسینین پوزدی پرگار و جلالین
آچوب عباس او دمده یول خیامه
حضور زینبه گلسین سلامه
گوزیندن اشک پیروزی آخوردی
دیوردی چاتمشام مثل اینکه کامه
الینده بیرق قرآن اسوردی
وروردی قدرت دل خاص و عامه
ایشین اول دمده بیر تیریله دشمن
وروب اول شیر یکتانین تمامه
جبینیندن دگن اوخ اوچ پریدی
گیندیردی جهانه قاره جامه
ایشیق گون گوزلرینده تیره لندی
حسینین گوندوزین دوندردی شامه
کسیلدی صورت تکبیر علقم اوستن
یازا عاجز قالور اوضانی خامه
چاتوب مقصوده شمشیر اوینادانلار
هزاران لعن اولا اهل ظلامه
دوشوب قوللار اوزولدی ال الیندن
قیامت اولدی اول مرد قیامه
دوشنده پرچم عباس الیندن
حسین الدی چاتوب عدوان مرامه
نقدری بیر کچیک اوخ جان آلاندی
کیمه دگدی ایوی اول تالاندی
اصابت ایلدی سقا گوزوندن
ازل بیر باشینه دنیا دولاندی
اوچومجی اوخ که پرت اولدی زهیندن
دگوب سرعتله مشکه سو جالاندی
اگوب باشون دیزه ایتدی مقاب
ل
اوخی چاتسین بیر آز دالدالاندی
هوادن غفلتی بیر وزنی سنگین
انوب آهن عمود باش پارچالاندی
همان لحظه داغلدی فکری باشدان
اورکده غم غم اوستونده قالاندی
دیدی ای زندگی کاش اولمییدون
آدون مثل یالان دنیا یالاندی
بدندن روحیم ای کاش آیرلیدی
گوزوم گورمیدی دوره م ال چالاندی
آخوب قان پیکریم سستالدی نیلوم
قاچان لشکر قیتدی آرخالاندی
سوئی نهر فراتین قان اولوبدی
کیم عالمده اونین تک قان سالاندی
دیدی تز گل حسینیم داده قارداش
گلوب بیر منظره ایجاده قارداش
آت اوستن دوشموشم دشمن چاپور آت
بولورسن رحم یوخ اعداده قارداش
یارالی شیر ایچون شورا قوروبلار
اولولار قتلیمه آماده قارداش
اوزوم السیز امان یوخ اللی لردن
بوجنگی دوتما بیله ساده قارداش
چالخور پیکریم قان لخته سینده
قانیم گول گول دوروب صحراده قارداش
دایانمش باش کسنلر باشیم اوسته
یاخیندور باش ورم جلاده قارداش
بو السیز باشیمه گل سنده ال چک
الون قربانی بو افتاده قارداش
سعادتمندم الان باشیم اوسته
گلیبدور گل ننه م زهراده قارداش
قورولموش بزم ماتم قتلگهده
فغان وار عالم معناده قارداش
سنون گلماخلقیوا یول گوزتلور
عدن ساقی سی الده باده قارداش
او دم قارداش سسینی قارداش آلدی
سولوب رنگی شه دینین سارالدی
شتابان دوندروب یوز نهره ساری
اوزون عباس اولان قتلایه سالدی
گوروب اون یدی جلاد ستمگر
گلوب باش کسمگه آواره قالدی
ولی قارداشدا بیر غیرتلی قان وار
یامان گونده او قان قارداشه حالدی
او حالداکیم حسینی گوردی سیندی
ابوالفضلین سینان باشی اوجالدی
حسین اگلشدی بیرده باشین آچدی
دیوب وای قارداشیم ال باشه چالدی
ازل قانلی جمالین سیلدی قانین
گوروب اوپماق یوزین امر محالدی
یوزین قویدی او قان دوتموش جماله
مشامه تز بهشتین عطرین آلدی
دیدی زهرا ننملن هیچ دانشدون
نجه شیرین غزل شیرین مقالدی
((امینی))مطلب ایستور سنله مندن
که ائللردی بو درگهده قوجالدی
- شنبه
- 23
- مرداد
- 1400
- ساعت
- 17:1
- نوشته شده توسط
- یوسف اکبری
ارسال دیدگاه