ال چک ای شمر ستم پیشه پیمبردن اوتان
زادهٔ حضرت زهرائيله حیدردن اوتان
ناگران خیمه ده قویما حرم آهولرینی
دورما جهل اوسته باجیم زینب مضطردن اوتان
اوتان ای شمر دنی
چوخ اوتاندیرما منی
زادهٔ فاطمهٔ اطهردن
نور چشم و دل پیغمبردن
معرفتدن یوخ اثر سنده ایا شوم و دغل
من بو تنگ عرصه ده هیهات ورم بیعته ال
ویرمامیش بوینووی قیتر آتیوی ضرب العجل
چیخ بو عباس گزن مایه لی سنگردن اوتان
چولقانبسان نه بو بیگانه لرین جامه سینه
ویرمیسان مهریوی دیوانه لرین خامه سینه
لعن حق ابن زیادیله امان نامه سینه
سیندیر اوز عهدیوی تز باری او کافردن اوتان
من بو شاهنشه گردون فلکین نوکرییم
طفل چاقیمدن ایله نان و نمک پرورییم
بسدی بو رتبهٔ مافوق که سر لشگرییم
صاحب شأن و شرافت شه محشردن اوتان
من ابوالفضلم اوزوم فاتح خیبر بالاسی
قویمارام تک قالا بو چولده پیمبر بالاسی
گوز تیکبدور منه قارداشیمین اصغر بالاسی
شرم قیل خرداجا شش ماهه او اصغردن اوتان
اولموسان امر یزیدیله بو اندازه جری
یغمسان باشیوه بو چولده گروه کُفری
گتمرم اولسا حسینین گینه قووماخ نظری
آچ گوزون سن بو وفا مخزنی نوکردن اوتان
یاخشی سودا دگول ای شمر بو سودا چک الون
ننگ ایدور آدیوی تاریخ ده بو بدعملون
جیر امام نامه نی گیت گلممیش آخر اجلون
کفر خیز اولما حیا قیل حق داوردن اوتان
کیم یازبدور بو علی اوغلونا دستور امان
شل اولا اللری شرم ایلمیوبدور او یازان
توکممیش تپراقا باشلاریزی چون برگ خزان
خواب غفلتدن اویان گیت بو برابردن اوتان
حامی یم الده بو جان نقدی امام زمنه
گیت امان نامه وی جیر توک یره گسترمه منه
دست بیعت وره هیهات ابوالفضل سنه
ورمیوب بیعته ال ساقی کوثردن اوتان
چکمیشم من بو وفا جامین ازلدن باشیما
کج دینمز بیری بو گوزلریم اوسته قاشیما
ایلرم کور او گوزی که باخا کج قارداشیما
دونمرم دونسه ده دنیا من او سروردن اوتان
گوزلورم برج محبت ده غم اولدوزلارینی
ساخلیرام مد نظرده حرم اولدوزلارینی
ناگران قویما او صاحب کرم اولدوزلارینی
ماه و خورشیدیله سردسته اختردن اوتان
التماس ایلمه گوندن قمر آیریلمیاجاق
باغلیبدور بیله زرین کمر آیریلمیاجاق
آلمینجان بو " امینی " ثمر آیریلمیاجاق
باش گوتورمز گوگه دیوانیله دفتردن اوتان
- شنبه
- 23
- مرداد
- 1400
- ساعت
- 17:36
- نوشته شده توسط
- یوسف اکبری
ارسال دیدگاه