بلبلی گلشندن آیرماق گلوم
آدمین اولادینه اولماز هنر
ببری شکار ایله دیسینلر سنه
حیدر کرار کیمین شیر نر
پوزما گورچین یواسین قوی قالا
قصدی اونین واردی چخاتسین بالا
قوش یواسیندا دیمه تک قوش اولا
شاید الون دگسه ایلانلار چالا
مرد ایگیت اول مردیله ور ال اله
سعی ایله نامرده قورولسون تله
خان چوبان اول قوردا قویون ورمه سین
تولکی جسارت ایلینمز کَله
واردی گوجون ساخلا گوجستانلارا
ورمه هنر نانجیب انسانلارا
چوخ گورونوب دنیادا بیر ناتوان
دار آغاجین قوردی قودورقانلارا
بیر جور اولوب ایندی فنا دنیادا
آزدور ایدن حمد و ثنا دنیادا
آخرتین جاده سی یاددان چخوب
سالدیروروخ چوخلی بنا دنیادا
چشمهٔ انصافی بولاندیرمیاخ
خیمهٔ امنیتی یاندیرمیاخ
بش گونه خاطر بو فنا دنیادا
باغری لاری قانه دولاندیرمیاخ
آی گوروم آمریکانی قان آغلاسین
ایلسین آهیله فغان آغلاسین
الله اونی درده دچار ایلسین
باعث اولوب اهل جهان آغلاسین
جنگی بیزیم اولکه میزه سالدیلار
دنیامیزی بیر بیرینه چالدیلار
یوکله دیلر غم یوکونی بیزلره
آرخالانیب اوزلری قارتالدلار
عمده دعامیز بودی منجی گله
تیغ شرر بارین آلا بیر اله
اللری قرآن علمین اسدیره
اوندا بیزه روشن اولار مسئله
یوسف زهرا شه مستضعفان
گلسه یقین دور آلاجاق امتحان
دشمن قرآنه جهنم بلی
دوستا گلستان اولاجاقدور جهان
باشلاناجاق اوندا اصیل انقلاب
دوتمالیوخ گللریمزدن گلاب
مفرق اولور ایندی قزلار ولی
اوندادا مفرق اولاجاق درّ ناب
سنده"امینی" اوخی اشعاریوی
چک قباقا طوطی گفتاریوی
شبهه یوخوندور عملونده اگر
سسله آدین گرم ایله بازاریوی
- یکشنبه
- 24
- مرداد
- 1400
- ساعت
- 11:40
- نوشته شده توسط
- یوسف اکبری
ارسال دیدگاه