خلقت ده علی درّ گرانمایه دی خلقه
حق دن به حقیقت بلی سرمایه دی خلقه
زیبا آدی سرلوحهٔ هستیده گلبدور
ایجاده علی عهد الستیده گلبدور
بیر نور هدایت دی علی اهل جهانه
سلطان ولایت دی علی اهل جهانه
گوزلرده تجلی ایلین نور علی دور
باشلاردا اولان شور بلی شور علی دور
ایجاده گترمشدی اونی حضرت داور
هنگامهٔ بحرانیده پیغمبره یاور
دنیایه قدم قویدی علی بیت خداده
مافوق دی هر خیل بشردن دیمه ساده
بیر آیه دی یر وردی بونا سورهٔ کوثر
کوثر اوزی زهرادی ولی آیه سی حیدر
فانی دی جهان لیک بو حیدر قالی باقی
کوثر بونا وابسته دی بو کوثره ساقی
دنیاده علی شهرتی افلاکه اوجالدی
آلدی باشینا مرحبی گوگدن یره چالدی
حیدر نجه حیدر که اوگون اژدری بولدی
بیرگون ده یخیب قلعه در خیبری بولدی
ممتاز ترین فرد شجاعت ده علی دور
بال و پر آچان عرصهٔ طاعت ده علی دور
باش سجده یه قویجاق دیدی یارب منه پرواز
سردار اولوب عالملره اول قوّلی سرباز
شأنینده کفایت دی اوگون ختم رسالت
فرمایش ایدوب سن سن علی شاه ولایت
زهرائیله سن سرمد افراد بشرسوز
الله تعالایه بوگون مد نظرسوز
سیزدن گلجاقدور بشرین اون بیر امامی
هر تک تکی نین اولمالی دور فوق مقامی
اسلام علمی سطح جهاندا اسه جاقدور
عدلیله اسوب ریشه کفری کسه جاقدور
عاشور بلا کرب و بلا واردی قباقدا
ظلم و ستم و جور و جفا واردی قباقدا
پیروز اولاجاق قان ولی شمشیره علی جان
عالم او آخان قانه اولار خیره علی جان
سن فاتح اولارسان بولورم بدر و حنینه
اما قالاجاق کرب و بلا دشتی حسینه
باشیندان هامی اهل و عیالین آتاجاقدور
عالم اونیلن حد کماله چاتاجاقدور
قان اوسته قوم اوسته قیلاجاخ عشق نمازین
تنها اوزی یاره دیجاخ راز و نیازین
مدفون اولاجاخ وعده گه عشق احدده
مزدی اونون آماده دی الله صمدده
چوخلار آغاما طالب دیدار اولاجاقدور
جمعیله"امینی" ایله زوار اولاجاقدور
- یکشنبه
- 24
- مرداد
- 1400
- ساعت
- 13:51
- نوشته شده توسط
- یوسف اکبری
ارسال دیدگاه