اگر صاحب قلم لر چوخ یازوب ایثار زینبدن
وگر چوخ آشنالیقلار اولوب افکار زینبدن
منیم طبعیم جوشور جوشقون سولار تک پیچ و خملرده
چیخور ذرات لر دریاچهٔ اسرار زینبدن
او زینب که اولوب روز ازلدن غملر آماجی
طواف کعبه عشق حسینی آختاران حاجی
اولوبدور حاجیان راه عشقه هادی ناجی
یاراشماز دور بجز زینب حسینه آیری بیر باجی
گرک حمد و ثنا و شکر ایداخ دادار زینبدن
اوگون که قویدی زهرا دهرده دورت غنچهٔ بی خار
همان دورت غنچه نی اوز سینه سینده حیدر کرار
بجردوب هر بیرین بیر نحویله بیر بلبله غمخوار
اولوب حاصل خانم زینب حسینه محرم اسرار
حسین اسراری ایلردی مدام اظهار زینبدن
او گهواره ای که یاتمشدی حسین اوندا اوشاق چاقی
قدح در کف کنارینده گزردی کوثره ساقی
اونین تعظیمینه گوندردی خالق اهل آفاقی
همان گهواره قالمشدی حسیندن زینبه باقی
که اوپّوشدی حسینین اللری گهوار زینبدن
ازل نقاشی نقشین چکدی بیر تخت زر اوستونده
یرین تخت ایلدی تختین قویوب برگ تر اوستونده
او بیر گل دور که بلبلر آچوب بال و پر اوستونده
همان عصمت دی بش قارداش وروب بیر معجر اوستونده
آچیلموب لیک او معجر لحظه ده رخسار زینبدن
- یکشنبه
- ۲۴
- مرداد
- ۱۴۰۰
- ساعت
- ۱۳:۵۴
- نوشته شده توسط
- یوسف اکبری
ارسال دیدگاه