سرمدین نور خداوند جلی فاطمه دور
مظهر حضرت ذات ازلی فاطمه دور
رونق بارگه قدس علی فاطمه دور
جمله مخلوق جهانین سببی فاطمه دور
انبیا خاتمی نین ام ابی فاطمه دور
اوندا که حادثهٔ کون و مکان اولدی شروع
سیر سیاره و هم سیر زمان اولدی شروع
خلقت حور و ملک انسی له جان اولدی شروع
خلقتین گللری نین سرسبدی فاطمه دور
هر نه فانی دی قالان بیر ابدی فاطمه دور
یرلره گوگلره هریانه ورور نور بتول
حضرت داوره بی واسطه منظور بتول
هر یارانمش باشا باشدان ایاقا شور بتول
شوری هر بیر باشا ایجاد ایلین فاطمه دور
آدمی جنته ارشاد ایلین فاطمه دور
ایم اعظم دور آدی باشدام ایاقه حسنات
حقی وار حسنی چوخ افکاری عزیزیم قویا مات
کشتی نوحه وروب سهملی طوفاندا نجات
موج طوفانلاری خاموش تیلین فاطمه دور
هر نیی بیر بیرینه توش ایلین فاطمه دور
گلدی بیر گونده خلیل اللهه یار اولدی خانم
گوردی یوخ چاره سی بیچاریه چار اولدی خانم
جانی نین حفظینه جامامه حصار اولدی خانم
درده نمرودی گرفتار ایلین فاطمه دور
ناری ابراهیمه گلزار ایلین فاطمه دور
بیر زمان یاریدی یاران کلیم اللهیلن
گوردی گتمز یولا حق پیروی هیچ گمرهیلن
ایتدی درگیر رعیت لری ظالم شهیلن
تخت دن ظالم دورانی سالان فاطمه دور
مردی نامردیدن الحاصل آلان فاطمه دور
ببر زمان حضرت پیغمبره ده شر ددیلر
وار الی سحریده اوز قومی مکرر ددیلر
الدی اوغلانلاری ال چالدیلار ابتر ددیلر
گلدی تز سورهٔ کوثر هدفی فاطمه دور
وارلقین قوخما پیمبر صدفی فاطمه دور
قزلارین گتمیشیدی جمله وقاری آرادان
خاری بیر کیمسه چادانمازدی خلاصه یارادان
وردی زهرانی پیمبر ایوینه پای یارادان
غیرت و عفت و عصمت یارادان فاطمه دور
محو ایدن کفر و نفاقی آرادان فاطمه دور
دوقوز ائل بیت پیمبرده خانم اولدی عزیز
جبرئیل اولدی غلامی ، ملک و حور، کنیز
استقامت ده اوجا داغ مثلی صبره دنیز
عمق دریای کرامت ده اوزن فاطمه دور
قهرمانلار صف عشاقه دوزن فاطمه دور
کیمسه هم کفو اولا بولمزدی او ریحانیه تا
آستانینده یاتانلار واریدی صبح و مسا
مرتضی قرعه سینه ایلدی معبودی عطا
حیدری حیدر کرار ایلین فاطمه دور
دینه قوتلی علمدار ایلین فاطمه دور
فاطمه بیر ایتی شمشیری دی حیدر الینه
حیدرین دوشدی او شمشیریله خیبر الینه
ال که دگمشدی اوایل ده پیمبر الینه
اول همان اللره محکم یاپوشان فاطمه دور
ختم پیغمبره صدیقه نشان فاطمه دور
اوندا که اشقی الاشرار جسارت ایلدی
یاردور حیدره اغیار جسارت ایلدی
آه پهلوسینه مسمار جسارت ایلدی
سقط اولان محسنی آلقانی آخان فاطمه دور
آلقانین هم در و دیواره یاخان فاطمه دور
بولمورم بو سوزی کیم سالدی "امینی" دیلینه
مدحی تبدیل ایده زهرا خانمین نسگیلینه
دفتر طبع دن ای کاش بو نیسگیل سیلینه
هر سوزون هم دوزی هم دادی خانم فاطمه دور
درس حریتین استادی خانم فاطمه دور
- یکشنبه
- 24
- مرداد
- 1400
- ساعت
- 17:52
- نوشته شده توسط
- یوسف اکبری
ارسال دیدگاه