ای جلوه ویرن روضه رضوانه محمد
ای سایه سالان عالم امکانه محمد
ای مهد شرف رمز بقا مظهر پاکی
سن بذل ایلدون رتبنی وجدانه محمد
ایمان اوزی ایمان گتیروب سویلدی اشهد
اقرار ایلدی سن کیمی جانانه محمد
ای درسینی جبریل ویرن غار حراده
ای آدمیت اورگدن انسانه محمد
شاهنشه اقلیم وفا علت هستی
ای طعنه ویران جاهی سلیمانه محمد
لبخندویی ساتمام گل و ریحان بهشته
اوخشار دوداقون غنچه خندانه محمد
نقاش چکوب عکسویی ایوان بهشته
احسن سنه احسن گوزل ایوانه محمد
صورتده قاشون آیه ی تطهیری یازوبدی
جان قربان ایکی نجم درخشانه محمد
وللیل یازوب زلف سیاهون قمر اوسته
عاملدی دیلون علّم الانسانه محمد
هر گولدیقی جان ظاهر اولور لوءلوء و مرجان
درس اورگدیسن سوره رحمانه محمد
قرآن سنون انواروه آیینه کیمیندی
قرآن اوزی آیینه دی قرآنه محمد
یوسفلر اسیر اولدی خم زلف سیاهه
یوسف توکولر ویردیقی جان شانه محمد
ای کوثر والا لبوه تشنه دی کوثر
تعریف ایلور چشمه حیوانه محمد
پاکیزه دموندان دم آلوب عیسی مریم
ای تاج شرف موسی عمرانه محمد
یعقوب که آغلاردی همیشه یوزی گولدی
همراه دی داوود خوش الحانه محمد
حاتم ندی بخششده ایا خاتم مرسل
اوخشار کرمون بارش بارانه محمد
گوز ویردیقی جان خون ایدوسن قلب جهانی
قلبیم ایلیشیبدور سر مژگانه محمد
- سه شنبه
- 26
- مرداد
- 1400
- ساعت
- 10:40
- نوشته شده توسط
- یوسف اکبری
- شاعر:
-
جهان سلیمانی
ارسال دیدگاه