مولا بو عشقی عالم امکانه ویرمرم
چوخ پر بهادی قیمت ارزانه ویرمرم
هر قطره گوز یاشیم که آخور بی بها دگُل
بو در اشکی گوهر غلطانه ویرمرم
تپراقدا اولسا مهر نمازیمدی تربتون
هرگز بوخاکی چشمۀ حیوانه ویرمرم
پیک اجل گلنده منیم قبض روحیمه
سن گلمه سن بو جانیمی جانانه ویرمرم
وار بیر علاقه منده، حریم مزاروی
الله بیلور که گلشن رضوانه ویرمرم
جدون دیوب نجاته حسینیم سفینه دی
ئولسمده بوسفینه نی طوفانه ویرمرم
بیر عمر قویموشام یوزیمی آستانیوه
بو آستانی ملک سلیمانه ویرمرم
بیر روسیاه نوکریوم ایله سن قبول
بوافتخاری حشمت سلطانه ویرمرم
گلزار کربلا ده اولان معنویتی
مینلر صفای صحن گلستانه ویرمرم
چون مرز وحد یوخدی بوعالمده عشقیمه
عمروم قوتارسا عشقیمی پایانه ویرمرم
دیبایه فقر کسوتینی ائتمرم عوض
پشمین کلاهی افسر خاقانه ویرمرم
دردیم محبتوندی نیازیم محبتون
واللهی من بو دردیمی درمانه ویرمرم
آخر نفسده جلوه ی مهر جمالیوی
مینلر فروغ نیر تابانه ویرمرم
پیراهن عزادی لباس ارادتیم
رخت سیاهی خلعت الوانه ویرمرم
"خوندل" بولر امید، او دربار رحمتی
سنده بویور امیدینی حرمانه ویرمرم
- سه شنبه
- 26
- مرداد
- 1400
- ساعت
- 10:46
- نوشته شده توسط
- یوسف اکبری
- شاعر:
-
حاج حیدر خوندل
ارسال دیدگاه