قاسم آماده اولوب عرصه میدانه گئدور
نقد جان الده دوتوب محضر جانانه گئدور
ساقی میکده میخانه نی رندانه آچوب
محفل عشقی قلندرلره جانانه آچوب
یولی اولده نچه رند حکیمانه آچوب
نوبت باده یتوب قاسمه رندانه گئدور
ایله مست ایلوب او مخموری شراب ازلی
بند نعلینی آچیق قبضه تیغینده الی
جنگه فکرین متمرکز ایلیوب مثل علی
دیه سن یانماقا ئوز شمعنه پروانه گئدور
گوردی مولا بئله جنگه گئده بو طفل صغیر
تئز ایاقدان سالاجاق نیزه و شمشیر یله تیر
امرائدوب پیرهن اوستن سالا بیر برد حریر
اولا حافظ که ده خنجر برانه گئدور
لشگرین قلبین آلوبدی نظره الده حسام
ییخماقا پرچم فرماندهی نی ائتدی قیام
صفلری سندیرا لشگر اولا بی نظم و نظام
یول سالوب مرکز اردویه بو عنوانه گئدور
نوجواندور هله نورس بو جوان نبوی
باغ وحدتده آچان گلدی گل مرتضوی
هیبتدن یاغیری صولت و سهم علوی
قصد ائدوب عرصه جولانگهی مردانه گئدور
بیرجواندورهله رخساریده یوخ خطدن اثر
سنی اون دورت اولا اولماز ایلیوب عزم خطر
نه زره دن اثر اگیننده نه کیتفنده سپر
بی محابا قویوب اوز مسلخ عرفانه گئدور
لشکره ائتدی خطاب ای سپه کوفه و شام
قاسم بن حسنم حیدر صفدری بابام
جنگه اقدام ائلسم فکر ائده سوز الده حسام
یوز قویوب شیر خدا خندقه شیرانه گیدور
قوشونون کثرتینی آلمادی اصلا نظره
باخمادی قان توکن اللرده قلج نیزه لره
حمله اولدی او چولده سپه خیره سره
اود سالا ساعقه تک خرمن عدوانه گئدور
گوردی سعد اوغلی تاپوب یول قوشونا ضعف و خلل
چیخدی لشگردن آجیقلی او زمان سسلدی گل
هارداسان گورموسن ارزق ندی بو جنگ و جدل
کیمدی جولانه گلور عرصه ده جولانه گئدور
قوی قدم عرصه میدانه ئوزون اولما نحیف
جنگه روحیه سی افرادین اولوب گورنه ضعیف
سنسن آخر بو جوانه بیلورم عمده حریف
کیمدی سندن صورا بو جنگه دلیرانه گئدور
ارزقه گلدی بو سوز ویردی عمر سعده جواب
ندی فکرون بو عملدن منی ائتدون نه حساب
روبرو هاردا اولار جنگیده بیر شیخلیه شاب
هاردا بیر تازه جوان جنگینه پیرانه گئدور
اذن وئرسن بو کشاکشده سنی شاد ائدرم
جنگه اوغلا نلاریمی بیر به بیر ارشاد ائدرم
سنه بو طرزیله بو عرصه ده امداد ائدرم
کوره سن جنگه بو چولده نئجه فتانه گئدور
ارزق القصه عمر سعدی اودم رام ائلدی
مکریله فیصله وئردی ایشی اتمام ائلدی
بیربیر اوغلانلارینی جنگینه اعزام ائلدی
هربیری جنگه گلور دوزخ نیرانه گئدور
کوردی ارزق بو جوان علوی عاشق پاک
ائتدی دئرت اوغلونی بیربیر بو معارکده هلاک
بو مصائب اثریندن سینه سین ایلدی چاک
ئوزی آماده اولوب جنگه او دیوانه گئدور
چکدی بیر عربده آت ایسته دی میدانه سالا
قانینه قان ائده اوغلا نلارینون قانین آلا
آتادور نیله سین آخر نه که شیریندی بالا
بو گئدیش بیلمدی اما اجلستانه گئدور
روبرو اولدی او دم قاسیمله ارزق دون
دورت اوغول داغی اورکده ئوزی سر مست جنون
قاسمین گوردی الینده قالاجاق زارو زبون
بیلدی بو جنگ دگیل ورطه طوفانه گئدور
آلدی شمشیر اله ایلدی آهنگ جدل
اولدی ما بین ده بیر نئچه قلج رد و بدل
قاسم بن حسن القصه تاپوب ارزقه ال
پیکری یئرده قالوب صوتی بیابانه گئدور
سالدی قاسم یئره تا پیکر صد پاره سینی
کسدی هر سمتیدن اول فتنه گرین چاره سینی
گوردولر صید ائلیوب دشمن مکاره سینی
ارزقین الده باشی محضر سلطانه گئدور
محضر شاهه یتوب آتدی باشی مقدمینه
تا تسلی اولا سلطان ولانین غمینه
قاسمین سیر ائلدی حالتینه عالمینه
اوزگه عالمده گوروب جنگه او فرزانه گئدور
مبتلادور ئوزی معلومیدی سوز عطشه
سالاجاق سوز عطش باشینی مین کشمکشه
بیر قدح باده مسلم وئره اول لاله وشه
مست اولا ایندی که سر منزل جانانه گئدور
ساقی میکده عشق و محبت علنی
تازه دن مست ائلدی قاسم گل پیرهنی
دئدی بو باده ائله حاله سالار ایندی سنی
کیم ایچور نعره سی بو عرصه ده کیوانه گئدور
پیر رندان خراباتیدن اول باده پرست
رخصت آلدی اولا هم کاسه رندان الست
ال تعلقدن اوزبدی دیه سن عاشق مست
یول سالوب اودلی گلستانه خلیلانه گئدور
الغرض رجعت ائدوب رزمگهه جنگ ائلسون
تازه دن کفریله جنگ ائتماقا آهنگ ائلسون
وسعت عرصه نی دشمن لرینه تنگ ائلسون
جنگ ایچون باغلیوب امیدینی یزدانه گئدور
دایانوب مرکز میداندا دلیرانه دوروب
روبرو لشگر کفاریله مردانه دوروب
اودسالا خرمن جاهلره فرزانه سالوب
الده شمشیر ی یانور شعله سی کیوانه گئدور
جنگه اقدام ائلیوب نعره تکبیر چکور
کفری نابود ائده بی واهمه شمشیر چکور
حمله ائتسون قوشونا نقشه و تدبیر چکور
قطره تقصیم دوتوب جانب عمانه گئدور
ناگهان آلدی او دم دور برین قوم عدو
چیخدی صفدن او زماندا دئدی بیر حادثه جو
ایندی مشغولیدی نعلینی نون اصلاحینه بو
بئله فکر ایلوری گشت گل و بستانه گئدور
- شنبه
- 30
- مرداد
- 1400
- ساعت
- 22:43
- نوشته شده توسط
- یوسف اکبری
ارسال دیدگاه