بویردور کربلا صحراسی زینب
بو دشتین وار بیوک غوغاسی زینب
بو صحرا وادی درد و بلادی
بو صحرا بیر محل ابتلادی
بو صحرا مدفنیم دور کربلادی
وار اوزگه عزت عظماسی زینب
بویر دشت بلاكوی وفادی
صفالی دلره دارالصفادی
مریض عشق ایچون دارالشفادی
سوزین وار صورت و معناسی زینب
بودشتین جلوۂ جانانی واردی
منایه بو یرین رجحانی واردی
سوسوز یتمیش ایکی قربانی واردی
که وار قربانگه زیباسی زینب
منانین هاردا وار بیله مناسی
منانین هاردا وار بیله صفاسی
منانین هاردا وار یتمیش فداسی
اولا بیله شرف داراسی زینب
وار اوزگه نشئه بو کوی وفاده
هدفلر بیردی یتمیش بیر فداده
باتار قانه غلام و شاهزاده
اساساً یوخدی استثناسی زینب
وفا شمعی اولار بوردا فروزان
وفا پروانه سی یتمیش ایکی جان
اولالّار بیر شرار عشقه سوزان
بودور عشق و وفا ایماسی زینب
دوتار جوّ فضائی ابر پیکان
بولود تک یاغدیرار قان دلده قان قان
زمین کربلانی دولدورار قان
ایدر بو دشتی قان دریاسی زینب
اوقانه غرق اولار وارسته جان لار
نه جانلار جوهر جان نوجوان لار
جوان لار نه جوان سرو روان لار
ریاض عشق زیب افزاسی زینب
شهیدان وفانین سرخ قانی
ایدر دامان دشتی ارغوانی
اولار بو سرزمین دین گلستانی
گلر عطر بهشت آساسی زینب
بو دشته گلمیشم جان و سریله
گل أوزلی قاسم گل پیکریله
علیّ اکبریله اصغریله
یازام قاندان وفا طغراسی زینب
ویروب دل عالم قالو بلاده
آلوب جانه بلا لفظ بلاده
وفای عهد ایچون بو کربلاده
حسینین واردی عاشوراسی زینب
نه عاشورا بیوک غوغاسی واردی
نه غوغا شور نهضت زاسی واردی
نه نهضت اوندا دین احیاسی واردی
بودور عاشوریمین معناسی زینب
بوچولده اوخلانار شش ماهه اصغر
گل اوزلی قاسمی ایلَلَّه پرپر
ایچر جام شهادت اوغلوم اکبر
اولار مجنون غم لیلاسی زینب
سپهر هاشمی ده ماه تابان
ابوالفضلیم اولار جانانه قربان
دوشرقان دجله سینده قانه غلطان
یارالی قدّ سرو آساسی زینب
اولان پابند پیمان ألستم
می وحدت ایچن باده پرستم
واریم دین نشئه سی مخمور و مستم
قانیمدور عشقیمین صهباسی زینب
فدای راه دین اولّام بویرده
قتیل اهل کین اولّام بویرده
کفنسیز من دفین اولّام بویرده
منه وار عزّت کبراسی زینب
بو صحرادور حسین قانه باتان یر
گوزوندن ماسواللهی آتان یر
یارالی جسمیله یورقون یانان یر
وار عشقیله سر و سوداسی زینب
منه فیض شهادت وار یارالی
سنه رنج اسارت وار بلالی
بلایه من کیمی دؤز ای وفالی
صفا روحی وفا سیماسی زینب
بلاده سن شریک اعظمیم سن
باجیمسان هم آنام هم همدمیم سن
من ئولسم بوردا صاحب پرچمیم سن
شکسته قلبیمین یاراسی زینب
آنام صبر ایلدی هر ابتلایه
اؤزین ایتدی فدا دین خدایه
آنام تک سنده صبر ایت هر بلایه
اولان ای کربلا زهراسی زینب
اولار بو یاتدیقیم یر خلقه منظر
اولار سینم گلی شهزاده اصغر
قوجاقیمده گلر هنگام محشر
جزاده وار بیوک غوغاسی زینب
آلا اکبردن ایستر توشه قبریم
ایاق آلتدا آلار آغوشه قبریم
شبیه عرش اولار ششگوشه قبریم
اولار چوخ رؤیت زیباسی زینب
ویروب جدیم اوزی بیله بشارت
گللّر شیعیان پاک طینت
ایده للر قبریمی بوردا زیارت
اولاردی معرفت داراسی زینب
اگر چه تائبا چوخدور گناهون
حضور حقده وار روی سیاهون
اولاللار روز محشرده پناهون
حسین و کربلا زهراسی زینب
اولا تائب نقدری جاندا جانون
حسینه آغلا توک اشگ روانون
حسین امضا ایدر خط امانون
گواه ایلر وفا سیماسی زینب
- شنبه
- 30
- مرداد
- 1400
- ساعت
- 23:0
- نوشته شده توسط
- یوسف اکبری
- شاعر:
-
صادق تائب
ارسال دیدگاه