ای بشر سعی ائله ابلیس هوسدن اوزاق اول
دینوه صدمه ویران دهریده کسدن اوزاق اول
طائر روحیوی قویما دوشه بیجا خطره
سالما دامه اوزوی رنج قفسدن اوزاق اول
چاغورار صوت دل انگیزیله دنیا گلینی
اعتنا ائتمه تلاش ایله اوسسدن اوزاق اول
گونده مین یول بَزَنَر ایلیه اِغوا بیرینی
بیریانار اوتدی گوزتله اوقبسدن اوزاق اول
مؤمنه زنگ خطر دی او خوش آوازه‌لری
بو فنا ملکیده نیرنگ جرسدن اوزاق اول
قویما دگسین سنه حتی نفسی بیر لحظه
آلار ایمانیوی مسموم نفسدن اوزاق اول
فرصتون وار نه قدر جهد ائله آزاده یاشا
دوز دولان عمرده افکار عبثدن اوزاق اول
خار و خسدور بوجهانون حَشم و اجلالی
باغلاما بئل اولارا خاریله خسدن اوزاق اول
سرعتیله گئدوری مرکب جرمیله گناه
اوزوی سالما بلایه او فرسدن اوزاق اول
گتمه بیهوده قاباقدا دالی قالما بیرده
بویوروب اهل نظر پیشله پسدن اوزاق اول
سِرّ مکنونیوی فاش ایلمه داروغه لره
محرم اولمازلا چوخی بعضی عسسدن اوزاق اول
بئله فرمایش ائدوب قاسم نارو جنت
نفسوی ساخلا فشارات رمسدن اوزاق اول
گوشوار ایله قولاقوندا او مولا سوزونی
مشعل راه سعادت بول علینین اوزونی
عالم زهدیده مولای توانادی علی
مظهر پاکی و ایمانیله تقوادی علی
نفسینه غالب اولوب حال حیاتینده اودور
رب الارباب کیمی شهرتی والادی علی
بنده‌ی مطلق حق ، عبد خداوند کریم
یاور اهل ولا دشمن ادنادی علی
ها علیٌ بَشَرٌ کَیفَ بَشَردی او جناب
حضرت ختم رسلدن صورا تنهادی علی
گلمیوب عالم ایجاده اونون همتاسی
نقدر واردی جهان قدریده اولادی علی
بویوروب سرور کونین رسول مدنی
شهر علمم اونا دروازه‌ی اعلادی علی
تاپشوروب دینی پیمبر اوزی چون واقفیدی
یوز وئره هرنه بلا، صبریده دریادی علی
جنته رجعت ائدندن صورا زهرا آتاسی
توش اولوب دردو غمه الده وار اسنادی علی
یاندیروبلارقاپوسین صدمه گوروب فاطمه‌سی
بی وفالر دئمیوبلر که معزادی علی
حقی غصب اولدی اولوب یرمی بش ایل خانه نشین
بولمیوبلر نجه شخصیته دارادی علی
عدلینین صحبتی اولسا دئیلر هر یرده
حاکم مقتدر و رهبر دانادی علی
عدلی باعث اولوب ئولدوردوله آخرده اونی
بیربئله غمده اورک قان اولا باجادی علی
عرشه و فرشه چکلوب قاره اوگون اولدی عزا
زینب غمزده نون اولدی گونی لیل دجا
نار غم قلبینی یاندیردی گلوب فریاده
صبحه‌تک شبنم اشگی دوزولوب سیماده
اللری باشدا فغانیله دیردی آتا وای
گوزیاشی قانه دونردی بوغم عظماده
ناله سی عالم امکانی پریشان ائلیوب
قالمیوب تاب و توان نائبه‌ی زهراده
اوخشیاردی آتاسین یانه یانا سویلردی
ای گورن عمرده هر درد و غمی دنیاده
ابن ملجم ستمی یاندیروب آغلاتدی منی
یوخ یتن پایه ی ظلمونده ائله جلاده
باشوه وئردی نماز اوسته ستمله شمشیر
سجده گاهوندن آخان قانه باتوب سجاده
آیرلوب طائر روحون یورولان پیکردن
اوچدی جناته طرف ائتدی مقام اعلاده
قویدولار تپراقا جسمون گیجه‌نین نصفیده
قوردولار حلقه ماتم ائله بیر مأواده
وار یقینیم که آنام دفنیوه گلمیشدی ئوزی
اود دوتوب یاندی منیم تک آنام اول اثناده
بولمورم قالدی نه حاله، نلر اولدی او زمان
باشوون یاره سینی گورجاق او دل ناشاده
چخدی فکر ایلورم ئوز دردی یادیندان آنامون
باغری قان اولدی جفا و ستم بیداده
چاک ائدوب سینه‌ی مجروحینی اشگین الدی
بزم ماتم سنه برپا ائلیوب معناده
رشته ی الفتوی قیرما (جوانی) بیر آن
سن علی نوکری اول غالب اولانماز شیطان
- شنبه
- 30
- مرداد
- 1400
- ساعت
- 23:11
- نوشته شده توسط
- یوسف اکبری
- شاعر:
-
موسی جوانی تبریزی
ارسال دیدگاه