بو گون سرور مردان نماز اوسته یخلدی
قلجلاندی باشیندان نمازاوسته یخلدی
سینوب پایۀ ایمان یخلدی شه ابرار
دولوب قانیله محراب اولوب عارضی گلنار
گلوب نالیه جبریل ایدر عالمه اخطار
دییر صاحب ایمان نمازاوسته یخلدی
بوگون باد ستمدن علی گلشنی سولدی
سینوب فرق شریفی چو شق القمر اولدی
یتوب قاشینه شمشیر گوزی قانیله دولدی
اولوب قاننه غلطان نمازاوسته یخلدی
ایدوب ملجمین اوغلی بوگون ظلمده طغیان
ویروب بیر ایله یاره علی دوشدی ایاقدان
دوروب کسر نمازین قلا اولمادی امکان
قالوب طاعتی نقصان نماز اوسته یخلدی
گوروب زینب کبری اومظلومۀ دنیا
دییولر علی الدی دوتوب کوفنی غوغا
گوروب تا حسنینی ایدوب مطلبی جویا
نه سوز دور آتامیزدان نمازاوسته یخلدی
او بیر آز یولی یولداش اولوبلار ایکی قارداش
سراسیمه حرمدن گلوب مسجده بیر باش
او احوالی گورنده آخاردی یوزه قانیاش
دولوب گوزلره آلقان نماز اوسته یخلدی
دیز اوسته باشین آلدی اوز اوغلی حسن آغلار
حسینین گوروب آغلار امام زمن آغلار
حسین و حسن آغلار اوخیبر شکن آغلار
قویان عالمی گریان نماز اوسته یخلدی
اوساعتکه عزیزان قیام ایتدی قیامت
حسین قانیله گوردی دولوب مصرع طاعت
وضو آلدی قانندان نماز ایتدی اقامت
قیام اولمادی امکان نماز اوسته یخلدی
سنان ابن انس تا یتوشدی او فکاره
بوغازین چوخوروندان وروب بیر ایله یاره
کسولدی سسی ذکرین دیینمزدی دوباره
حسین نحر اولوب عطشان نماز اوسته یخلدی
بیلور خالقی ایتدی نجه سجده وکرنوش
قالور ایسی قوم اوسته او اوچ ساعتی مدهوش
ایدوب جلوۀ جانان حسینی ایله خاموش
چخوب زینبی یاددان نماز اوسته یخلدی
بو گون(خادم) اگرچه الون بوشدور عملدن
نه صحت بدنون وار نه توفیق ازلدن
دییوب ذکرووی ویرمه علی دامنین الدن
بو گون سرور مردان نماز اوسته یخلدی
- شنبه
- 30
- مرداد
- 1400
- ساعت
- 23:21
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه