ای درگهی حسرتده قویان عرش خدانی
صاحب شرف ائتدی شرفون کرب و بلانی
یغدون باشیوا یتمیش ایکی شخص مجرّد
هر تک تکی وارسته جوانمرد و مؤیّد
نورسته قوجا طفل رضیع ابیض و اسود
هیهات گوره تایلارینی عالم فانی
هر تک به تکی ملک علایقدن ال اوزدی
مردانه لیگین گوهرینی رشتیه دوزدی
هیچ بیلمدیلر کیم گجه دور یا که گونوزدی
جانانه فدا ایلدیلر پیکری جانی
جمع ایلدی میخانه ده عاشق لری ساقی
خم لار ایچلوب قالدی او می دن گینه باقی
معراج ایده لر روح الامین گتدی براقی
سرمست آپارا فرشدن عرشه شهدانی
مست اولدولا اول لحظه که صهبای بلادن
افلاکه عروج ایلدیلر کرب و بلادن
سرنیزه براق اولدی بو معراجه ولادن
عشق ایتدی هدایت سفره اهل ولانی
درد اهلی ایچینده او می جام وفادن
آسوده لشوب دولت درمان و شفادن
بو باده همان باده دی که شور و صفادن
مست ایلدی یتمیش ایکی مخمور صفانی
بو باده همان می دی که حرّ ابن ریاحی
بیر قطره دگیل دی اونون اوّلده مباحی
بیر لحظه ده آچدی یوزینه باب فلاحی
سالدی اوزونی میکدیه توبه زمانی
ساقی ایدر ارشاد گر اولسا بیری یاغی
شأنین اوجادار محرم ایدر تازه قوناغی
بیر میکده دن مست ایلیور قاره نی آغی
بیر گوزده گورر پیر مغان شاه و گدانی
بو باده همان باده دی که شوقیله شوذب
میخانه ده اوز ساغرینی ائتدی لبالب
بیر جرعه چکوب باشینه مست اولدی مرتّب
عاشق لر آرا عابس ایلن ائتدی تبانی
بیر جرعه کیم ایچدی بو شراب ازلی دن
عابس تک اطاعت ایلدی امر ولی دن
مشق آلدی وفا درسینی اولاد علی دن
تفسیر ایلدی قانیله آیات وفانی
بیر جرعه بو پیمانه دن آخر وهب ایچدی
مین خم دئیسن باده او والا نسب ایچدی
نه باده؟ بهشتین سویون اول تشنه لب ایچدی
بو جام یقیندن ایچه گلمزدی گمانی
بو باده نصیب اولدی بُریر ایله زُهیره
سرمست اولوب چخدیلا سر نیزه ده سیره
ساقی وئره هیهات بئله باده نی غیره
نامحرمه محرم دئمز اسرار خفانی
بو باده همان باده دی که وادی طَفده
ممتاز ایلیوب چوخلارینی شأن و شرفده
قویماز دایانا عوسجه نین اوغلونی صفده
آسوده مگر مسکن ایده نوک جدانی
بو باده همان باده دی که عشق طبیبی
بیر جامیله درمان ایلدی درد حبیبی
چکدی حرم یارینه آخر او غریبی
سر منزل دلبرده حناسی اولا قانی
بو باده همان می دی که خاصّ ایتدی عوامی
اولدی صف عشّاقیده ممتاز مقامی
بیر جرعه سی ایتدی اوزی آغ قاره غلامی
مست ایلدی گل پیکرینین عطری فضانی
بو باده همان باده دی که دیرده پیری
صاحب شرف ایلوب اوجالوب عرشه صفیری
اسلامه مشرّف ایدوب اول پاک ضمیری
تثلیثی آتوب تک بیلوب الله خدانی
بو باده همان می دی ایدر مرده نی زنده
ترسانی مسلمان ایلییر سرکشی بنده
یعقوب عجب فکریله گلمیشدی گلنده (1)
فکری عوض اولدی ایچوب اول جام فنانی
القصّه ایچوب بیر به بیر اول باده دن اصحاب
مدهوش دوشوب هر بیری بیر گوشه ده سیراب
خم لاردان آزالموبدی ولی ذرّه می ناب
خرسند ایلیوبدی بو عمل پیر مغانی
باخدی دوزولن رشته ده دردانیه ساقی
گوردی داغیلوب جمله سی میخانیه ساقی
بیلدی یتوشوب بیر نچه فرزانیه ساقی
نوبت که گرک مست ایده اول جمع وفانی
اوّل بو یولی اکبر گلگون کفن آچدی
عاشق لره مین فصل او گل پیرهن آچدی
میخانه ده عشق اهلینه باب سخن آچدی
مست ایلماقا اولدی بنی هاشمه بانی
سرباز سرافراز سر افکنده فتاده
رخ مقدم شاهه قویا شطرنج بلاده
فوراً اوز آتندان او زمان اولدی پیاده
مات ائتدی می ایچماقدا هامی اهل جهانی
مست ایلدی مست اولدی همان جام ازلده
جان نقدینی سرمایۀ عشق ایلدی الده
جانانی آلا اول گئده گئتده گَله گَلده
آتدی نظریندن هوس سود و زیانی
میخانه خیالیندا اولوب کعبۀ حاجات
باشلوبدی اورکدن او زمان ذکر مناجات
هیهات دئدی ای شرف اهل خرابات
وئرمم وئره لر بو میه مین باغ جنانی
سن سن منه عالمده گل و گلشن و جنّت
مین روضۀ رضوانه دگر سنده کی طلعت
ای گوهر لطف و کرم ای کان محبّت
شرمنده ایدوب موهبتین ارض و سمانی
موسی کیمی محو اولدی علی نور صفایه
مستانه قدم قویدی او دم طور صفایه
دوندردی بلا دشتینی معمور صفایه
بیر نخلۀ طور ایتدی باشی نخل سنانی
قاسم او جوان علوی گوردی صفادن
بیر بیر هامی مست اولدی او صهبای بلادن
تز ساقیّ عشقین الینی ئوپدی وفادن
یعنی منه ده لطف ایله بو جام بلانی
گوردی می آلوب ایچمه میش آرامینی الدن
فرمایش ایدوبدور ندی فکرون بو عملدن
عرض ایتدی بو باده منه شیریندی عسلدن
مأیوس ایلمه سن بیل آنان فاطمه جانی
بیر جرعه وئروب باده دن اول تازه جوانه
پیرانه چکوب باشینه اُول فرد یگانه
رندانیله هم کاسه لیقا اولدی بهانه
قاتدی قوجالار صفّینه اول تازه جوانی
عبّاس نچه جرعه او پیمانه دن ایچدی
مست اولدی ایکی قولدان او هنگامه ده گئچدی
عالمده حقیقتدن اؤزی باطلی سچدی
قویدی باشینا عزّتیله تاج وفانی
اثبات ایلدی عشقینی بو عاشق
جانباز
عاشقلیقی ائتدی ایکی دنیاده سر افراز
عاشق لر آرا اولدی مقاماتیده ممتاز
عالم لری مبهوت ایلدی عزّت و شانی
عاشق بو خیالیله گئچر صاق و صولوندان
کیم دوشسه ایاقدان دوتا معشوق قولوندان
مین یول ئوله چخماز بو تمنّاده یولوندان
واضحدی فنادن تاپار عشق اهلی بقانی
سلطان وفا سیر ایلدی عالم عشقین
گوردی ائله عالمده دی اؤز محرم عشقین
آرتیردی شرف وئردی اونا پرچم عشقین
فتح و ظفرین بَللیدی پرچمدی نشانی
بیر مشکیده اعطا ایلدی خسرو عادل
سقّا اولا عطشانلارا اول ماه شمایل
بو منصب شاهانیه گوردی اونی قابل
چون بیلدی که سقّالیقا وار تاب و توانی
معلومیدی اوّلدن اونا عالمی حالی
تعلیم اؤزی ایتمشدی او جان ملکینه والی
پرورده سینین ائتدی مقاماتینی عالی
اون یدّی مقامیله تمام ائتدی عطانی
واله دی بو جانبازه نه تک عالم ناسوت
بو عشقیده مبهوت قالوب پردۀ لاهوت
تک سود امری ائتدی ایکی عالمی مبهوت
بیر گولماقی سیندیردی اوخی اگدی کمانی
آلدی سود امر تا نظرین شاه کبیرین
گوردی ایله مخموریدی اوز تشنه اسیرین
آغوشه چکوب جان کیمی اول طفل صغیرین
مست ائتماقا حمل ائتدی بلا بزمینه آنی
مست ایلدی اول طفل صغیری قوجاقیندا
اول می دن اثر ایندیده وار گل دوداقیندا
غنچه دییه سن تاپدی طراوت بوداقیندا
دوندردی بهشته چمن میر هدانی
بو باده همان باده دی که حضرت ساقی
سرمست ایلیوب بیر به بیر اصحاب وفانی
عاشق لره میخانه ایدوب دشت عراقی
شور اوسته اوجالدوب گویه آهنگ نوانی
یا اَیُّهَاالعُشّاق که بو باده دن ایچدوز
مستانه باشیزدان بو خراباتیده گئچدوز
احسن سیزه وحدتدن اؤزوز کثرثی سئچدوز
آتدوز نظروزدن هامی آمال جهانی
منده سیز ایچن ساغری ایندی اله آلّام
میخانۀ وحدتده ایله ولوله سالّام
سیزدن بتر احواله بو میخانه ده قالّام
نعره م گتیرر میکدیه شمر و سنانی
«شبخیز» بو مجملده حدیث اولدی مفصّل
ال ساخلا سوزه طول وئروب ائتمه مطوّل
دوت دامن مولادن اماندور چکسن ال
مأیوس ایده هیهات بو مولا شعرانی
عرض ائت بیلوسن «فرشی» و «شبخیزیله» «نادر»
مشتاقیدیلار قبریوه ائت تذکره صادر
ای هر نه چتین مسئله نین حلّینه قادر
قسمت ایله بو اوچ نفره کرب و بلانی
ای خلقتی خلقتده صفات اللّهه آیت
بو بزمده هر کیمسه اولا اهل ولایت
سن بیل آناوین جانی گل ائت لطف و عنایت
احسان ایله اُول بارگه عرش بنانی
- یکشنبه
- 31
- مرداد
- 1400
- ساعت
- 18:22
- نوشته شده توسط
- یوسف اکبری
ارسال دیدگاه