بو نئجه گوندی طلوع شب یلدا ایلیوب
عالمی نور رخی وادی طوی ایلیوب
قالوب حیرتده عدو بیر بیره نجوا ایلیوب
دئدیلر اکبره هر کیمسه تماشا ایلیوب
بشر اولماز بیله اکبردی تجلا ایلیوب
الحذر الحذر اول طره ی طراریندن
یوزمین عاشق دلی آویزیدی هر تاریندن
خر موسی صعقا پرتو رخساریندن
بودور عیسایه وئرن دم دم گفتاریندن
کی او دم مرده ی صد ساله نی احیا ایلیوب
قاریشوب بیر بیرینه لشکر اوجالدی سخنی
قالدی دریای تحیرده گوروب قوم دنی
ظلمت محضه وئروب نور او جمال حسنی
هاردا قالموش او دین طوریده ربی ارنی
گوره پیدا اوزینی لله الاعلا ایلیوب.
بیر نظر عارض آ ل و خط خالینه باخان
قالوب حیرتده دیردی بودور حی منان
لامکان کرب و بلا دشتینی ایلوبدی مکان
بو یقین سوزدی دیولر کی گورونمز سبحان
لن ترینی اشیدوب موسی تمنا ایلیوب.
قسم اللهه بو الله دگور حیدر دور
باشدا امامه سی امامه ی پیغمبر بود
خلقا و خلقن و نطقا بو همان سروردور
دئدیلر یوخ بو حسین اوغلی علی اکبردور
آتاسیندان کی جهاد اذنی تمنا ایلیوب.
دل عشاقه خم طره لری قاتلدور
کی بونا عاشق اولان طائفه خونین دلدور
مشک آهوی ختن قاندان اولان حاصلدور
جلوه یوسفده ائدن حسن نه آب و گلدور
پرده ی عصمتی صد پاره زلیخا ایلیوب.
ابن سعدون حق ایوین یخسون آچوب جنگه علم
بودو نقاش وئرن نقشینه هر آنیده دم
روح الارواحدو بونسوز کی عدمدور عالم
عدم آیینه ی لا دور بو وجود اکرم
لای نفییله چو اول صورت الا ایلیوب.
بیر قوی دشمنی اولدوروب اول تازه جوان.
ویرمیوب حیدر کرار تک اعدایه امان
قیدوب خیمه لره عرض ایلدی ای بابا جان
جایزه ایله کرم گر سووا وارونسا گمان
کون و ماکانه سیزی حق اوزی سقا ایلیوب.
اوپدی شاهینون الیندن کی او شهباز سفید
عطش اولدوردی منی عرض ائدوب ای شاه وحید
بیر علاج ایله هلاک ائتدی منی ثقل حدید
سوسوز اول دم گوروب اوز اوغلینی هادی رشید
گوشه چشم عنایاتیله ایما ایلیوب
دیلینی ویردی اوغول آغزینا خشک وتریلن
مهر ایدوب هیکل توحیدینی انگشتریلن
چون کمیل ابن زیاد نخعی حیدریلن
کوکبا قدطلعا صبح علی اکبریلن
نکته باریکیدو چون بیر بیره نجوا ایلیوب.
مرتبه مرتبه زندیق دو عشقیله طباع
بس مطیعدون اوغول ایندی اولوبسان مطاع
گلدی مقصود و حقیقت اله دفع اولدی صداع
گئت اوغول خیمه ده بیرده ایله لیلانی وداع
خرمن عمرینی هجرون اودی یغما ایلیوب.
گلدی میدانه مبارز طلب ائتدی او جوان
بیر یهودی نجه ناگه ائدوب حمله دالیدان
قلیجا وردی علی اکبرون آلنیندا مکان
یول با یول هاشمی خال اوستن آخوب قرمزی قان
وه نه شق القمر آسانیمیش اعدا ایلیوب.
باشینون قانی اولوب عارض آلینه نقاب
قولارین بوینونا سالدی دئدی دورما ای عقاب
سالما بو یئرده منی خیملره ایله شتاب
قالمادی منده جهاده داخی بیر طاقت و تاب
گوزلری یولدا آنام ایندی مصلا ایلیوب.
بیر نفر اولمادی اولوقته گیره آرخاسینه
یاره کاریگر اولوب زینی باسوب سینه سینه
بیر الین قویدی مبارک باشینون یاره سینه
قوزانا هرچی ائدوب دورماقا جرئت اوزونه
خرد عمودیله بلین گوردی او ترسا ایلیوب.
قیلدی بو حالیده حمله گنه بیر آیری شقی
گوردی آت اوسته اوتورماقیله یوخدور رمقی
دوشدی آئینه ی حقون یئره گلگون شفقی
داغیلوب چولره قرآن مجیدون ورقی
دوشدی آتدان یارالی تپراقی ماوا ایلیوب.
کربلایه باش آچوخ گلدی چو پیغمبر اوزی
قوملار اوسته یخلوب گوردی علی اکبر اوزی
کیمیا تک اثری وار ولی یوخ پیکر اوزی
عرش نیلی دن او دم گوردی شه خاور اوزی
قره توپراقی قیزل قانی مطلا ایلیوب.
آزدی واللهی آخا هر مژدن صد جیحون
نوح وار ایلیه عالملری مستغرق خون
علی اکبر کیمی عالمده خدایا اوغولون
قطعه قطعه آتا آناسی گورن وقته اکنون
پیکرین صبر و تحمل نئجه آیا ایلیوب.
لطف ائدر روز جزاده او شه تشنه لبان
وار امیدیم وئره هر بیتیمه بیر بیت جنان
ندی جنات اوزی اولمیا اوردا جانان
سنی تحسین ایلیه سویلیه ای جان ای جان
آفرین نطقوه "بیضا" ید بیضا ایلیوب.
- دوشنبه
- 1
- شهریور
- 1400
- ساعت
- 12:29
- نوشته شده توسط
- یوسف اکبری
ارسال دیدگاه