یوسفیم اولموش باجون خار مغیلان یولداشی.
اولموسان اما ئوزون یعقوب کنعان یولداشی.
راضیم بو دشتیدن تصویر دلبر گورمیشم
دلده اکبر سسلیوب الله اکبر گورمیشم
مکتب وصل آچمشام زهرای اطهر گورمیشم
تاپمشام جانانی جانانیم اولوب جان یولداشی.
بیلمرم اصلا بو دشت غم فزاده خار وار
جلوه جانان وار شوق وصال یار وار
جایگاه یاریدور اغیار یوخ دلدار وار
کعبه گاه عشقدور روح اولموش ایمان یولداشی.
عاشقم من عاشقانه ترک احباب ائتمیشم
آبله اولموش ایاقیم هر غمه تاب ایتمیشم
بوته خار اوسته یوخ پرقوده من خواب ائتمیشم
باده عشقیله اولام حی سبحان یولداشی.
انس دوتماق خاریلن راز سرشتیمدور منیم
پا پیاده چولده قاچماق سرنوشتیمدور منیم
عالی بیر میخانه دور بو چول بهشتیمدور منیم
اولمشام بو روضه رضواندا رضوان یولداشی.
قارداشیم اصغر عطشدن سو یرینه قان ایچوب
ایچمیوب ئوز باشینه حقدن یتوب فرمان ایچوب
صودامر قانین آچوب پر زهریلی پیکان ایچوب
حیف او نازک حلق اولوب اوچ شعبه پیکان یولداشی.
هجر دردین عاشق جانباز اولان یوخ آختارارن
وصل یاره یتمگه اوچ شعبه لی اوخ آختاران
پیک پیکان پیک وصلتدوراونی چوخ آختاران
یار حضورینده اولا ذوالعفو غفران یولداشی.
خورداجا بیر قز سه ساله غرق بحر رنجیده
بختی دوشمش ماته چون شه عرصه شطرنجیده
پربها بیر دوردور پنهان اولوبدور گنجده
گنجده پنهان ئوزی چوللرده پنهان یولداشی.
بو تیکان بو زجر دعوت نامه دلداریدور
جام وصلت دور بو چول لبریزدور سرشاردور
پرتگاه عشقدور هم جایگاه یاریدور
مونیسم یوخ اولموشام ناهید و کیوان یولداشی.
نازل اولموش جدیمه قرآندا تطهیر آیه سی
خورداجا بیر سالکم پیر مغان همپایه سی
عالم ذره اولان عهدون منم پیرایه سی
فاخرانه اولموشام من عهد و پیمان یولداشی.
گوشه ویرانه ده قالام مناجات ایلرم
پرچم وحدت آچوب حقه مباهات ایلرم
حقیمی غافل اولان اشخاصه اثبات ایلرم
منزلیم ویران قره تپراق منه جان یولداشی.
عدنیده اول منی پیشواز عموم عباس ایدر
اصغریم در سرشکین توده الماس ایدر
جنته پیر خرابات مغان اجلاس ایدر
آیه قرآنی گورسون اولدی قرآن یولداشی.
بیرکله دوزم کشاکشده وارام دنیائیلن
قطریم لکن رقابت ایلرم دریائیلن
رند و درویشم نه بیضایم ید بیضائیلن
اولموشام دنیا و عقباده عریفان یولداشی..
- دوشنبه
- ۱
- شهریور
- ۱۴۰۰
- ساعت
- ۱۳:۴
- نوشته شده توسط
- یوسف اکبری
ارسال دیدگاه