داریدن چیخدی مسیحا چرخ دوار اوستونه
شوقیله اوج ایلدی راس حسین دار اوستونه
کوچه و بازاریده سیر ائتدی کوی و برزنی
حقی اثبات ایلدی رسوا ائدوب اهریمنی
گوردی بو اعجازی دوشدی وحشته قوم دنی
اول کسوک باشیله گلدی بیرده پیکار اوستونه
گه چکوب دیر نصارایه اوقوم بی امان
گه تنور خولیده،گه نیزه ده وئردی مکان
گه دوداقیندن ئوپوب طشت ایچره چوب خیزران
گاه پرتاب ائتدیلر دار اوسته داشلار اوستونه
گزدیروب هر معبر و هر کوچه و بازاریده
گوردولر سسلر او باش انی ان الحق داریده
آیه ی قرآن تلاوت ائتجگین انزاریده
باطنن ملت توکولدی قوم خونخوار اوستونه
زمزمه تجمیع اولوب قوزاندی اولدی همهمه
بعضی لر بو صحنه نی درک ائتدی باتدی ماتمه
سویلدی من وئرمیشم فرمان عفوی آدمه
آدم و حوانی من گئتدیم بو معیار اوستونه
من همانم نوحه وئردیم خشم طوفاندان نجات
یونسه کام نهنگی ایلدیم مهد حیات
یوسفی زندانیدن ائدیم عزیز کائنات
گرچه قارداشلار اونی چکمیشدی بازار اوستونه
صبر درسین من دیوب ایوبه تدریس ائتمیشم
درد هجره دوزمگی یعقوبه تسلیم ائتمیشم
نقشه ی آب حیاطی خضره ترسیم ائتمیشم
راس یحیانی گتیردیم شور سرشار اوستونه
قدرت احیای نفسی وئردیم عیسی جاهیمه
موسیه عمرانیدن فرعونه سالدیم واهمه
ناری اشجار ایلدیم من حضرت ابراهیمه
قویمادیم ابراهیمی دوشسون اوگون نار اوستونه
سیر ائدن افکار تاریخی بیلون یکسر منم
جسم عالم روح خاتم سر پیغمبر منم
گوهر زهرا منم جان دل حیدر منم
گلمیشم ایندی جدال اوستونده گفتار اوستونه
اکبریم کربوبلا دشتینده می دن سیر اولوب
قاسمین طوی ساعتینده اوینیان شمشیر اولوب
اصغری سیراب ائدن اوچ شعبه لی بیر تیراولوب
گلمیوب عباسین اوخ زخمی آمار اوستونه
اکبرون باشینه هر خنجر دیوب بیر گول آچوب
قاسیمون پیکانیلر گیسولرین تل تل آچوب
اوخ گلوب اصغر بوغازینه دینده دیل آچوب
دوشدی عباسون ایکی قولاری قوملار اوستونه
اکبرون هر تار زلفیندن اوزوندن قان آخوب
اللره قاسم عروسی طوی حنا قاندان یاخوب
اصغریم قان نوش ائدنده آسمانه بیر باخوب
گلمیش عباسون عمودیله،تبهکار اوستونه
چکدی صف بیر سمتیده آتلی پیاده پیلوار
گوردیلر یوخدی وزیری رنگ رخ زرین نگار
عرصه ی شترنجیده شهمات اولوبدور شاهوار
کیش ائدنده دوشدی سس هر دشت و کوهسار اوستونه
قویمیوب قویماز حسینون عشقینی "بیضا " یئره
عرشیدن یاغسا یاغیش تک تهمت و فتوا یئره
آلمیشام من شهدن اجریم سالما سس بیجا یئره
بسدی آز شمشیر چک اول شاه ابرار اوستونه
- دوشنبه
- ۱
- شهریور
- ۱۴۰۰
- ساعت
- ۱۳:۲۱
- نوشته شده توسط
- یوسف اکبری
ارسال دیدگاه