باتدی گون یاتدی عدو قورخولی طوفان گئجه سی
قانلی میدانه سالوب سایه هراسان گئجه سی
یاتدی آرامشیلن بو گئجه افراد سپاه
یغیشوب بیر یاری یانمش چادرا عترت شاه
گوردی بو صحنه نی گیزلتدی ئوزین ابرده ماه
اولمادی روی مهون لحظه ای تابان گئجه سی.
خیمه دن چیخدی قرانلوق دا بیر اوچ یاشلی اوشاق
ایله وحشتله بیاباندا ائدوب عشقی سراق
چکدی گوداله اونی جاذبۀ عشق و فراق
تاپدی گودالیده ایستکلی سین هجران گئجه سی.
گوردی گودالیده خلوت ائلیوب یاریله یار
اولوب عشقیله لبالب گجه یاری او دیار
سینه سیندن او شهون اوخلاری چون ائتدی کنار
نور حق جلوه لنوب اولدی درخشان گئجه سی.
لامکان ورطۀ گودالیده چون ائتدی مکان
کائناتون حرکاتینده گوروندی نوسان
وئردی بو صحنه هامی ثابت و سیّاره تکان
آز قالوب ثابت و سیّار اولا پایان گئجه سی.
گوردی آی هر ایکی قولدان تن عبّاسی جدا
یخیلوب یان یانا میدانیده انصار خدا
بوکولوب البسۀ آهنه سیمای هُدا
یر و گوگ فخر ایلیور ناریله پیمان گئجه سی.
یئردن افلاکه اودی نغمۀ شبگیر دوشوب
صحن میداندا کسیلمیش الی بیر شیر دوشوب
پرچمی بیر طرفه بیر یره شمشیر دوشوب
تشنه لب قزلارا اولموش گجه بحران گئجه سی.
گرچه سو آختارار هر ملک ده دریانی گزر
دولانور بو گجه اما گوزی میدانی گزر
گزر آواره فراتون سویی سقانی گزر
دولانور هر یری آواره پشیمان گئجه سی.
بیچمیش اوخ بیر سودان اُوتری نیه اصغر بوغازین
اونداکی اوچدی کماندان هاوادا چالدی سازین
گوردی یوخدور سو وئرن وئردی سویی چکدی نازین
فکر ائله اولدی ربابون نجه نالان گئجه سی.
اکبرون باشدان آخوب صفحۀ رخسارینه قان
قویمیوب آخدوقیجا لیلی بیچاره ده جان
یخیلوب غشّ ائلیوب خیمه ده بی تاب و توان
آلوب آرامین الیندن اونون هجران گئجه سی.
لیلی نون آه و نواسی گئدوب عرشه دایانوب
ایستیوبدور باباسین خوابدن هر طفل اویانوب
زینبون شمع وجودی اورگی روحی یانوب
یانوب هر درد و غمه هر دم و هر آن گئجه سی.
گوردی هر سمتیده آی طوی دوتولوب داماده
حجله و شمع و حنا دسته گلی آماده
نجه داماد ئوزی نوباوۀ دل آزاده
بزنوب طوی اطاقی شام غریبان گئجه سی.
نوعروسون باشینا زینب ائدر نقل شاباش
باخار هر لحظۀ عروسه توکولور گوزدن یاش
یولار آهسته قرانلوق گجه بیر گوشه ده باش
طوی گونی اولموش اونون زلفی پریشان گئجه سی.
قولسوز آتدان یره چون دوشدی وزیرعرصات
کیش ائدوب پیل صفت دشمنی شاه غزوات
شه پیاده یخیلوب عرصۀ شطرنجیده مات
زینبون سولدی رُخی شام غریبان گئجه سی.
سنه ای مدّعی گر عشق حسین دور پیشه
قورخما محشردن آماندی ائلمه اندیشه
دوت حسین دامنینی خاتمه وئر تشویشه
عاشقون قبریده بیلم کئچر آسان گئجه سی.
دئمه" بیضایه " اولوب عشق حسین گمراهی
بیل بو عشقینده اونون واردی دل آگاهی
فخر ائدر یانسا جهنم اودونا واللهی
اولسون عشق اوسته قویون دوزخه مهمان گئجه سی
- دوشنبه
- 1
- شهریور
- 1400
- ساعت
- 13:55
- نوشته شده توسط
- یوسف اکبری
ارسال دیدگاه