حسینه قسمت اولدون یا نه ،ای سو
دونیدون کاش او گون القانه ای سو
اولان ای جاری هر صحرا و دشتدن
دمشق و کوفه و شام و حبشدن
روادور کیم یانا اصغر عطشدن
ولی ایچسون سنی بیگانه ای سو.
نه نوعی کئچدی احوالی حسینون
حایندان بیر اولاق حالی حسینون
عطشدن یاندی اطفالی حسینون
نجه شمعه یانار پروانه ای سو.
عطشدن چخدی عرشه پرده پرده
فغان و ناله و شیون بو یئرده
شهید کربلادن صونرا بیرده
نجه سن نوش اولورسان جانه ای سو.
ایچوب سندن جهان اهلی سراسر
اولوب سیراب غیر از آل حیدر
روادور تشنه لب حلقوم اصغر
نشان اولسون دم پیکانه ای سو.
سنی یوخ مانع ایچسون ایچسه هرکس
نه باعث اولدی بیلمم اولدی برعکس
وحوش و طیره اولدون اولمادون بس
نچون قسمت او لب عطشانه ای سو.
عطشدن اکبر ناکام ئولنده
نه قالدی صبر و نه آرام ئولنده
سودان اوتری سکینه جام الینده
گلوب بلبل صفت افغانه ای سو.
اسوب باد سموم تیر و خنجر
سولوب کرب و بلا دشتینده گل لر
اوتا یانمادیلار اما ئولنلر
عطشدن دوندیلر بریانه ای سو
پوزولدی بوستان آل یاسین
دل زهرای اطهر اولدی غمگین
حسینه اولمادون اولدون ولیکن
نصیب اُول فرقۀ عدوانه ای سو
مگر سن مِهر خاتون قیامت
دگولدون بس نچون ای بی حمایت
حمایت ائتمدون شمع هدایت
وئرنده جان سوسوز جانانه ای سو
دل احبابده قالموبدی یارا
ائله سو قصّه سین کوتاه" بیضا "
گورنده بیر سرین سو سویله آیا
حسینه قسمت اولدون یا نه ای سو
- دوشنبه
- 1
- شهریور
- 1400
- ساعت
- 14:1
- نوشته شده توسط
- یوسف اکبری
ارسال دیدگاه