نه همین چرخ بیزیله بیله رفتار قیلوب
بلکه عشقون باباجان شمره گرفتار قیلوب
هانی او نطق ، ائدم درد و غم و هجری بیان
مختصر عرض ائدرم دردیمی ای شاه جهان
نقدر سن واریدون تشنه آب ای باباجان
او قدر عشق منی تشنه دیدار قیلوب
سیل ظلمیله خراب اولدی بابا خانه دین
بیزی سندنصورا زنجیره چکوب فرقه کین
بو همان نازلی سکینوندی ائدر شیون و شین
سیلی شمر یوزین گور نجه گلنار قیلوب
جور اغیاریله میل ایلمشوک یاره طرف
گیدورم شوقیله پروانه صفت ناره طرف
وار نه حقی بیزی اعدا چکه بازاره طرف
عشق اکبر بیزی سرگشته بازار قیلوب
چرخ الی چکدی علی هجریله بو سینمه داغ
ائدرم اکبریمی وادی حسرتده سراغ
شب تار ایچره منه شعله آهیمدی چراغ
هجر مندن ایره لی فکر شب تار قیلوب
ناقه اوسته اوجالان وقته علی وای سسیم
ساربان قمچی ورار باشیمه یوخ دادرسیم
گرچه ظاهردم عشقونله منیم وار نفسیم
هجرون اما منی بیر صورت دیوار قیلوب
عود تک شعله چکوب شمع کیمین دیده ترم
غنچه تک محنت هجرانیله خونین جگرم
مجلس عشقده بیر بلبل بی بال و پرم
گلدن اوتری منه بو جور و ستم خار قیلوب
حاصل عشق بلادور بلی معناده صفا
او بلا ذوقینی درک ایلمز هر بی سر وپا
تاکه خلاق جهان ایلیوب ایجاد بلا
آل پیغمبری بو امره سزاوار قیلوب
بیر قوشام یاندیروب عشقون شرری شهپریمی
باغلیوب شمر لعین ظلمیله بال و پریمی
حق فروزان ائلیوب شمع رخ اکبریمی
منی پروانه تک اول ناره خریدار قیلوب
ناله و آهدن اوزگه منه یوخ هم نفسی
درد و غمدور بو یتیمون باباجان دادرسی
شمر بی رحم ،اوزاق یول ،من اوشاق طایفه سی
خارجی آدی من بیکسه تکرار قیلوب
گوره بیلمم باشوی نوک جداده من زار
گلی پژمرده اولان بلبل اولور زار و نزار
با وجودیکه اسیرلیک غمی ائتمیش منی خوار
گل یارون بلبل ئوزوم خارلر اغیار قیلوب
بو مصیباتی گوروب قالمادی "بیضاده" توان
گجه گوندوز دلینه داغ چکور عشق نهان
حشرده پل صراط اوسته ئوزین ایلر عیان
شاه اونا شیب و فرازی گوره هموار قیلوب
- سه شنبه
- 2
- شهریور
- 1400
- ساعت
- 14:28
- نوشته شده توسط
- یوسف اکبری
ارسال دیدگاه