ازل گون هر مصیبت واقع اولدی
مصیبات حسینه تابع اولدی
دفعاتیله یتدی انبیایه
گتورن اولمادی طاقت بلایه
حسینون باشی کئچمشدی جدایه
بلالر کربلاده جامع اولدی
اگر چه چکدیلر عیسانی داره
قویوب یوز داریدن دارالقراره
حسینی قطعه قطعه پاره پاره
هاچان دشمن ائدنده قانع اولدی
یخلدی صدر زیندن تپراقا شاه
گلوب شاهی زیارت قیلدی الله
گوروندی کربلا دشتینده ناگاه
او انوار الهی ساطع اولدی
گلوب بیربارماقین کسدی او بجدل
اولوب دریای قان گودال و مقتل
بدنده سالمیدی که ایکی ال
الینده ساربانون قاطع اولدی
نجه تقریر ائدوم الله و اکبر
ایاق یالین گلوب خاتون محشر
حسینی کربلاده تاپدی بی سر
او خاتون اوسته غملر راجع اولدی
او قانلی نعشی باسدی سینه سینه
اوپوب تا یتدی نوبت اللرینه
چکوب بیر آه الین قویدی بلینه
قد رعناسی غمدن راکع اولدی
نه کول باشه توکوم ای وای برمن
که قان آغلار یر و گوگ بو ستمدن
جناب زینبی قویمادی دشمن
حسینیم وای دیینده مانع اولدی
چیخارتدی یادیدن موسی و طوری
قیلوب راس حسین منزل تنوری
خانم زهرا ایچون الله نوری
که بیر مطبخ سرادن لامع اولدی
سوال ائتدی آنا باشسیز بدندن
الوی کسدی کیم اوغلوم بیلکدن
اماندور وئر خبرگیزلتمه مندن
وقوعات قیامت واقع اولدی
دوروب اگلشدی ناگه شاه بی سر
دئدی گئج گلدون ای بیچاره مادر
الینده ساربانون پاره خنجر
که بیر ناممکن امره طالع اولدی
ازل گئت معرفت اخذ ایله "بیضا"
امامون حقینه اول عارف آغلا
سویوب آغلاردی اهل بیتی اعدا
عدوی دینیچون نه نافع اولدی
- چهارشنبه
- 3
- شهریور
- 1400
- ساعت
- 17:33
- نوشته شده توسط
- یوسف اکبری
ارسال دیدگاه