حسین دیوانه سی عاقلدی والله
بیزه ایراد ایدن غافلدی والله
طواف کعبه زمزم دستمازی
حسین سيز مطلقا باطلدی والله
یاپشسون حلقه ی بیت خدادن
کفن گیسون لباس انبیادن
ال اوزسون دامن آل عبادن
بهشته گيتمگه حايلدى والله
بيرى مين ايل ايده قرآن تلاوت
تیکانلیقدا سالا محراب طاعت
همیشه باغلیا سنگ قناعت
ایده آج قارننا بیر عمر عبادت
چکه سعی و صفاده چوخ ریاضت
ایده ابلیس تک عرشی زیارت
ئورکده اولماسا حبّ ولایت
حسینه ایتمسه عرض ارادت
وجودی یانماقا شاملدی والله
بیری معروف اولا جرم و خطایه
یوزی قاره ، گناهی فوق العاده
قرا کوینک گیه بزم عزاده
دیه ای کاش اولِیدیم کربلاده
ئولنده پیکری قالسا اراده
نمازین قیلماسا گر شیخ ساده
حسین قویماز خجل گَلسون معاده
گنه سوز وار حدیثِ مَن بَکاده
شفاعت قولینه داخلدی والله
بیر عدّه منشی بی عقل و مایه
ایدور ئوز رایینه تفسیر آیه
اصولیّون سالوب مغزین خطایه
دیوللر عالماً بو ماجرایه
نیه گیتدی حسین کرب و بلایه
او شخصون شکّی وار قالو بلایه
اودور قائل اولوب چون و چرایه
اولا سُقراطه گر هم درس و پایه
شهادت سرّینه جاهلدی والله
آتام قربان او شاه سرفرازه
آنام قربان او نحر اولموش بوغازه
گوزوم قربان حسین قان دستمازه
باشوندا عاشقان پاکبازه
او نصرانی طبیب اهل رازه
سنی گورجك تاپوب اسلامی تازه
تشهّد ذکر ایدوب آلدی اجازه
دیدی به به یتیشدیم امتیازه
مسیحادن حسین قابلدی والله
حسین باش سجده ده ذکر و دعاده
ائدوب دورت شخص اونی بیردن اراده
اَوَل شمر اول سگ بی خانواده
صورا جبریل آچوب شهپر هواده
اوچونجی فاطمِیدی سرگشاده
امان دوردیمجیسیندن گَلدی داده
چخوبدور خیمه دن زینب پیاده
گوروب شمری دوروب عرش خداده
ائدوب حمله دیدی ای پست زاده
سمایه باخ، بلا نازلدی والله
نمونه معجز عشق آفریندن
گوروب مجنون بیر آهو گوزلریندن
که اوخشار لیلیه خوش منظریندن
دوتوب صیّادون عریان خنجریندن
دیدی بو دلسیزون قورخ کیفریندن
منی ئولدور، اونون ئوپ حنجریندن
بو بیر صحبتدی مجنون دفتریندن
گَل اورگَش عشقی زینب محضریندن
هامی عشّاقیدن کاملدی والله
نجه پروانه عشقون ساغریندن
اولوب مست اَل چَکَر بال و پریندن
گئچوب عشق اوسته زینب شهپریندن
آیردی شمری شاهون پیکر یندن
یاپشدی خنجر کین پروریندن
دئدی ظالم حیا قیل داوریندن
سن ئولدورمه، اوتان پیغمبریندن
ئورکده بیر یارا وار اکبریندن
همان یاره بونا قاتلدی والله
گوز آچدی ناگهان سلطان محشر
دیدی یالوارما ای غم دیده خواهر
قِییت سن خیمیه ، اولما مکدّر
گرک بیر من قالام بیر شمر کافر
اونا بیر صود ویروب ناپاک مادر
نه بیر الله تانور بو نه پیمبر
دئسون رحم ائت بیر آزدا شدّت ایلر
نصیحت ایتسه لر مین ایل مکرّر
بو قتله شمر دون عاملدی والله
نه قدری خلقتون وار انتظامی
قالار بو شمر ایدن ظلمون دوامی
اولونجا قائمون روز قیامی
سالالّار شبهیه خلق عوامی
بوتون تبلیغ اولار سنّی مرامی
حسینی "منزوی" سن دوت گرامی
ائشیتسون شعریوی شمرون غلامی
ایده تکذیب کیم علم امامی
مقامی اَسفَلُ السّافلدی والله
- چهارشنبه
- 3
- شهریور
- 1400
- ساعت
- 17:57
- نوشته شده توسط
- یوسف اکبری
- شاعر:
-
مرحوم رحیم منزوی اردبیلی
ارسال دیدگاه