علی ویرانه منزلده مکان بیر روزگار ایتدوم
قرا بختیم کیمی شام خرابی تیره تار ایتدوم
گیجه گوندوز فراقونده اورکلرداغدار ایتدوم
مداد کپریگیم خون دلیمدن آبدار ایتدوم
جمالون نقشنی لوح جماله زرنگارایتدوم
عروق جانیلن گوردوم دولوبدور الفتون قارداش
گیجه گوندوز خیالیمده دولانور صحبتون قارداش
اگر یوخدور مقابلده او سرو قامتون قارداش
گوزوم یاشیله نقش ایتدوم یوزومده صورتون قارداش
مطاف عشقمی خلق جهانه آشکار ایتدوم
ایدم ویران دل ملکین الیمده واردوبس قدرت
ولكن ایتمرم ویران اولونجه وار اونا علت
اورک طاق عدالت دور خیالون نقش پر قیمت
عدالت طاقنه عکس شه عادل ویرور زینت
اودور عکس رخون طاق دلیمده پایدار ایتدوم
جهاندا دوشمسون هیچکس برادر من دوشن درده
یانور قلبیم آخور اشگیم دمادم عارض زرده
سنیله ایلرم صحبت آرادا یوخدو بیر پرده
مجسم ایتمشم سرو قدون قارداش برابرده
او زیبا مقدمه در سرشگیمدن نثار ایتدوم
گوزوم یاشیله بیر نامه باجیم صغرایه گوندردیم
کتاب درد هجرانی ورق ایتدوم یره سردیم
بلا گوردوم بلا اوستن یوزوم هر یانه دوندردیم
یوزومدن دانه خالون خیالین قلبیمه دردیم
بو گویلوم مرغنون آب و غذا سین احتکار ایتدوم
منیم بیگانه لر هرگز چکلمزدی پناهیمدن
واریدی شاهلارون چشم امیدی پیشگاهیمدن
هانی قارداش علی اکبر اثر شاهانه جاهیمدن
مذمت یوخ اگر یانسام شرار شمع آهیمدن
اوزوم بو آتشی دور جهاندا اختیار ایتدوم
خرابه منزلیم قارداش انیسیم آه و نالم دور
اورک قانیله گوز یاشیم قارشمش یوزده با همدور
اوزومده بیلمورم والله بو عالم هانسی عالم دور
سر زلفونده گوردوم من مقام عشقی محکم دور
ایناندوم که زوال اولماز اوزلفه اعتبار ایتدوم
باجینون چشم امیدی اولوردایم برادر دن
عزیز قارداش نظر کسمز مصیبت دیده خواهر دن
همین امیدیله قارداش علاقه کسدیم ایللردن
کمند عشقوه گلدیم الیملن باغلادیم گردن
پناهونده علی اکبر قالام من افتخار ایتدوم
چخاندا شهر یثربدن گونوم گوندن قرا گلدی
قباقه حین سیریمده قضای کربلا گلدی
خیال صیدیله چخدیم کناره بو صدا گلدی
که ای صیادسن گتمه سنی ویردوم شکار ایتدوم
گورنده نیزده زلفون بو زلف پر نمی آچدیم
علامت لشگر اندوهه ماتم پرچمی آچدیم
أو گون افسون آهیمله طلسم ماتمی آچدیم
آتاندا تیر مژگانون ال آتدیم سینمی آچدیم
همان پیکان مژگانی اورکده بر قرار ایتدوم
توکنمز محنت شامی یازوب شرح بیان ویردوم
نچه أحباب همدرده بو اشعاری نشان ویردوم
محبت مکتبین گوردوم نجه گور امتحان ویردوم
مفصل مطلبی (صدری) کتاب اختصار ایتدوم
- چهارشنبه
- ۳
- شهریور
- ۱۴۰۰
- ساعت
- ۱۹:۲۲
- نوشته شده توسط
- یوسف اکبری
- شاعر:
-
استاد مرحوم صدری اردبیلی
ارسال دیدگاه