واعظین سوزلرینین ماحصلی پنده چیخار
شکری قالبه وورسان دولانار قنده چیخار
قالبِ عقلینه کیم ییغسا حکیمانه سؤزو
آسمانِ ادبه اولدوزو تابنده چیخار!
فکر ظرفینده گرگ اولمایا بیر یاوه سخن
دولسا گندیده شئیه ظرفین اؤزو گنده چیخار
عالیمین صورتینه باخماق عبادتدی بلی
عالیم ایله اوتوران کیمسه خوش آینده چیخار
ایری اولسا هر آغاج یا تنه‌سی وورسا دوگون
اره صاف ائتمه‌سه حتما عوضین رنده چیخار
شاعرین جامعه ده نقشِ رسالت واریدی
میلتین دردینی نظم ائتمه‌سه شرمنده چیخار
محتوا اولسا سوزونده دیری‌دیر هر دوره
انتقاد ایله‌سه دوز سوزلری سازنده چیخار
ئوللسه شاعیر اوزو، اشعاری گرگ زنده قالا
اؤزو گر قالسا، سؤزو اؤلسه، سرافکنده چیخار
مدحِ بیجا ائله‌مک شاعیری بی ارزش ائدر
هنرین رتبه‌سی، صدّيقْ هنرمنده چیخار
تیکان ايله اوتوران نیشی گرگ نوش ائله‌سین
گول ایله الفت ائله حاصلی لبخنده چیخار
بابا طاهر کیمی سؤز یاز اولا گول تک، هله ده
سؤزونون رایحه‌سی قله‌ی الونده چیخار
سولمایان گوللر اکیب سعدی گلستانینده
ائله گوللر کی خیال ایله‌مه گلشنده چیخار
طفل علمه بو وطن اولسا اگر گهواره
متبحر علما آری بو میهنده چیخار
اولسالار حامی اگر نابغه اندیشه‌لره
ابن سینا دولانان یئرده انیشتن ده چیخار
علما چشمه کیمین دیر سولاری پاک و زلال
نوش ائدن قطره لرین طالعی فرخنده چیخار
شهدا قانلاری‌نین قیمتی‌دیر حریت
سیر فضله فضلا وادی ایمنده چیخار
زر انسانیته نهضتیمیز اولدو محک
هر کیمین ناب‌دی اندیشه‌سی رخشنده چیخار
دردیمیز چوخدو گرکدیر یازیلا هم دئییله
گوشِ مسئوللارا فریادِ نویسنده چیخار
هله ده حکمِ قضاوت اوزانیر محکمه ده
میز فرجامه بئش ایلدن صورا پرونده چیخار
آچماییب لار وکلا شهریمیزین بیر دوگونون
موقعِ رای ده ولی بوللو نماینده چیخار
دشمنِ ظاهریمیز هر دو ابرقدرت دیر
تخم ناپاک خباثت ولی لندنده چیخار
استقامت ائله سوک دشمنیمیز قارشیندا
صبریمیز اولسا ضرر وقت معینده چیخار
بی تفاوتدیر اولار کی شهدانین قانینا
جمله سی هرزه علف مثلیدی گلشنده چیخار
سیل خون صدامی نابود ائده‌جک گئج تئزی وار
انتقامین ایپی دار اوستونه گردنده چیخار
صنعتی اولماسا شعرین نه دادی وار نه دوزو
میوه خودرو اولا گور لذتی پیونده چیخار
نه یه تشبیه ووروم نظمده جانسیز سوزو من
بیر قارا توستو مثالنده دی گلخنده چیخار
هاون مغزیده دگسه سؤزه فکرین چکشی
دفترین صفحه‌سینه نغز و برازنده چیخار
سفت و محکم‌دی نئجه میخک ایله دانه‌ی هل
دسته دگدیکجه گؤیه نکهت هاونده چیخار
او جوانلار کی دوشوب زهرلی افیون تورونا
ائتسه لر همت اگر جبهه ده رزمنده چیخار
باغبانین امگی بهره وئرر گول وقتی
زارعین زحمتینین قیمتی خرمنده چیخار
شعر دوشیزه‌سینه فیکریدی مشاطه بلی
وورماسا شانه اگر زلفی پراکنده چیخار
لعله بنذر ولی هر قیرمیزی داش لعل اولماز
خالص الماس اله چوخ رنجیله معدنده چیخار
"انورا" شعره خریدار بو گونلر چوخدور
شاعرین مزدی فقط بیر قورو احسنده چیخار
- چهارشنبه
- 3
- شهریور
- 1400
- ساعت
- 20:22
- نوشته شده توسط
- یوسف اکبری
- شاعر:
-
مرحوم انور اردبیلی
ارسال دیدگاه