گل حسینون آنا جان، گلدی شهادت گئجه سی
زینبه ایله حمایت بوقیامت گئجه سی
باخورام هرطرفه ناله دی شیون سسیدی
بر بلوک خوردا اوشاقدی العطش ناله سیدی
مین مصیبت اوخی بر زینبوین سینه سیدی
گل اوزون اول منه همدم بو قیامت گئجه سی
بر طرفده آلوب آغوشه رباب اصغرینی
گه باسور سینیه گاهی توکور اشک ترینی
گه اپور گوزلرینی گه قوریان لبلرینی
گوروی بو گئجه دی ای آنا وصلت گئجه سی
لیلی پروانه کیمی شمع مصیبتده یانور
باخور اکبر یوزینه طاقت و صبری تالانور
گه دورور اکبرینون باشینه حیران دولانور
بلوری دوشمز اله بربیله مهلت گئجه سی
غملییم غصه لیم چوخدی ملالیم بلوسن
بیله بر وقته منی یاد ایلیوب نه گلوسن
بلورم سنده منیم تک آناجان غصه لوسن
گل حسینه ایلیاخ ناله بو فرقت گئجه سی
هر سوزینده وار آنا قارداشمون غم اثری
ویرور هر لحظه و هر آن شهادت خبری
نولاجاق بو گئجه نون بلمم آچلسا سحری
یتمیه کاش آنا جان باشه بو وحشت گئجه سی
بولمورم خوردا اوشلاقلاری یغوم من باشما
یا گیدوم خیمه سینه مونس اولوم قارداشیما
یا ویروم رخصت آنا حسرتیله گوز یاشما
آغلوروم هانسی بر احواله بو حسرت گئجه سی
نولی بو چولده گلوب بر گله سن شیونه سن
باخاسان بو سوسوزوندان سارلان گلشنه سن
اولاسان بو گئجه بر مونس و همدم منه سن
آنا یاد ایتسه قیزین خوشدی بو الفت گئجه سی
اوغلوین بو گئجه باشدان داغلوبدور کمکی
بر بلوک عترت النده قالوب آخر اتکی
گل آنا گور نجه بر درده دوشوب تک بتکی
یوخ فراغت اولا آسوده بو مهلت گئجه سی
او احبا که (شهاب) ایلدیلر یاد سنی
اولارین مرحمتی ایتدی بو نظم محنی
سنده شکرانه سینه برده اوخی سر سخنی
گل حسینون آنا جان گلدی شهادت گئجه سی
- جمعه
- 5
- شهریور
- 1400
- ساعت
- 11:40
- نوشته شده توسط
- یوسف اکبری
ارسال دیدگاه