گُله که بلبلِ شوریده نون محبّتی وار
محبّت اهلی بولور که نقدر زحمتی وار
گورنده بلبلی گلشنده باشلیوب نغمه
دیمه وصاله یتوب هجریدن فراغتی وار
گیچن فراقِ غمیله گَلن خزان ستمین
سالور خیالینه مین نوعیلن شکایتی وار
علاوه گوز قاباقیندا وصال حالینده
رقیب وار که اونون اوزگه بیر رقابتی وار
هنوز غنچه آچوب اولمیوبدی کامل گُل
آلوب کنارینی خارِ جفا ، خیانتی وار
ایدوبدی پیرهنین پاره ، برگینی خندان
نه آبرنگ قالوبدور نه حُسنِ صورتی وار
گل و گیاهه باخاندا مجازی باخما گوزوم
او باخماقون ندی حظّی ، نه حقیقتی وار؟
تشبّهاتیله هر بیر آچان گُله باخسان
تمام مرثیه دور نوحه دور مصیبتی وار
او گل که غنچه لوقوندا اولوبدی خاره دچار
حسین الینده علی اصغره شباهتی وار
جفا الیله ایله اصغرین پوزوب حالین
نه حالی آغلاماقا گولماقا نه حالتی وار
بچوب بوغازینی پیکان آخوبدی قرمزی قان
آتا بالا بویانوب بیر بیریله شراکتی وار
گورن حسینون الینده او قانلی قونداقی
تصوّر ایلسه بیر دسته گُلدی نسبتی وار
یوزی گوزی الی قنداقی اونّوگی قانلی
چمنده لاله دی گویا آچوب طراوتی وار
اوخی امام اوزی چکدی بالا بوغازیندن
شکسته قلبیده گور بیر نقدر طاقتی وار
اوخون یریندن آخان قانی دولدوروب الینه
آتوب سمایه طرف بلمورم نه حکمتی وار
زبانحالیله عرض ایلسم مناسبدور
حضورِ یاره بالانون گوروبدی دعوتی وار
او قانی آتدی سمایه هدیّه قصدیلن
او دعوته بالانون یعنی چوخ رضایتی وار
ایدوبدی عرض الهی بو حاله اول شاهد
نقدر یتسه بلا عشقیمون زیادتی وار
هامی قضاوه رضایم ، هر امریوه تسلیم
زجاجِ خاطریمون زنگی نه کدورتی وار
ولی بو قومِ جفا ، شاهد اول که باخمادیلار
پیمبریله بو بی یاورین قرابتی وار
الیمدن آلدیلا بو چولده یار و یاوریمی
منیله گور بو گروهین نقدر عدواتی وار
قالوب الیمده بالام ، نعشینی بیر آلان یوخدور
نه اکبر و نه ابوالفضلمون حمایتی وار
ایله مؤثر اولوب بارگاهِ قدسه بو سوز
سزادی اهلِ سمانون دیسم که رقّتی وار
یتیشدی مصدرِ حقدن ملک لره فرمان
منیم یولومدا حسینون گورون نه خدمتی وار
او قانی اخذ ایلیون ، عرشیمه ویرون زینت
حسین هدیّه سیدور ، پربهادی قیمتی وار
گوروب حبیبنی چوخ غملیدور ، خدای خلیل
اوزی تسلّی ویروبدور عجب جلالتی وار
خطاب قیلدی حبیبی حسین ، ملول اولما
بو تحفه نون یانیمزدا بیزیم اجابتی وار
سنون که عمده غمون امّتون شفاعتیدور
غم ایتمه بو بالانون حشرده کفایتی وار
الونده ساخلاما قوی توپراق اوسته جان ویرسون
که یعنی اوخلودی ، رنجوریدی جراحتی وار
اونون خیالینی ترک ائت ، حبیبیم ایلمه غم
بهشتده وار اونا دایه ، استراحتی وار
حبیبِ صادقه محبوب ، تازه دم ویردی
همیشه عاشقه معشوقون استعانتی وار
قویوب یره بالانی حسرتیله بیر باخدی
او باخماقون نه قدر کیم بولور که حسرتی وار
دیولّه اللری قنداق ایچینده باغلیدی
بلنمورم بو سوزیکه دیولّه صحّتی وار
ایشتدوقومدی بو سوز منده نقلِ قول ایدورم
تصرّفانیدی یا اینکه واقعیّتی وار
آناسینون نه صودی نه خیَم ده سو واریدی
یانوردی بو بالادا اوچ گونودی شهرتی وار
بالیق کیمی چابالوردی آنا قوجاقینده
ایله شدایده آخر نه صبر و طاقتی وار
هم اوز یوزین هم آنا سینه سین ایدردی خراش
گوروب رباب او بالا مضطریدی وحشتی وار
گَتوردی قویدی اودور اللرین قماط ایچینه
یو سوز صحیح اولا معناده چوخ حسرتی وار
آتا گوروب که بالا ایستیر ال ایاق چالسون
قماط ایچینده دی جان ویرماقا صعوبتی وار
قماط بندین ایدوب پاره اوز الیله امام
نجه دوزوب دیمورم قوّهء امامتی وار
گوزی باخا باخا جان ویردی ، ال ایاق چالدی
گورن دیردی حسینون ده حالِ رحلتی وار
گوتوردی باغرینا باسدی او قانه غلطانی
دایانمادی داخی گوردی عدو شماتتی وار
گلوب خیامه چاقوردی باجیسی کلثومی
آناسینا ویره گوردی کمالِ خجلتی وار
دئدی آنام باجی گَل گتوردوم اصغریمی
یاتوبدی راحت اولوبدی سیزه نه زحمتی وار
بالامی حرمله سیراب ایدوبدی قانیلن
گیدوبدی هوشه ، الیم اوسته خوابِ راحتی وار
حرمسراده همینکه قضیّه نشر اولدی
او صود امر بالانین خیمه گاهه رغبتی وار
مخدّراتِ حرم بیر بیره دگوب یکسر
گورن دیردی که بیر رستخیز علامتی وار
آلاندا قارداش الیندن باجی او غنچه لبی
گوروبکه قارداشینون تازه بیر حکایتی وار
بالاسیدا اوزیده لاله تک قانه بویانوب
بیر اوزگه منظره سی ، اوزگه بیر سیاحتی وار
زبانحالیدی کلثومه چوخ مناسبدور
دیه حسین گینه سنده بهار علامتی وار
گتورموسن بو گلی قارداش هانسی گلشندن؟
نه خوش طراوتی ، خوش رنگی ، خوش لطافتی وار
گینه نه گُلدی بو خندان اولوب اتک دولوسی
نه تئز بو غنچیه بادِ خزان اصابتی وار
الونده اکبریمون قانین ، اصغرین قانی
دوباره تازه لیوبدور نه یاخشی ضرورتی وار
گَتور او قانی حسین جان منیمده زلفمه یاخ
بو گون باشیم آغاروب ، رنگه چوخ ضرورتی وار
اجازه ویر بونی قارداش ویروم آناسینه من
اوزی کنازه چیخانمور حجابِ عصمتی وار
الی اورکده قالوب انتظاریوی چکوری
نه دیزده طاقتی واردور ، نه دلده قدرتی وار
خیَم ده بوش بشگین باغرینا باسور آغلور
نه آه و داد و فغاندان بیر آنی غفلتی وار
علاوه خوشدی بالایه آنا دیه لای لای
آنانون اوزگه دلی ، اوزگه بیر عبارتی وار
مطوّل اولدی (شهابین) سوزی گمان ایدورم
سبب بو طولِ کلامه دلینده نیّتی وار
خدا بولور که نه جاه و جلالِ دنیادور
تمام عمریده بیر نیّتِ زیارتی وار.
- جمعه
- 5
- شهریور
- 1400
- ساعت
- 12:23
- نوشته شده توسط
- یوسف اکبری
ارسال دیدگاه