شاماتی تیره شام ایلدیم ، دود آهیله
پوزدوم یزید شوکتنی فَرّ و جاهیله
بِیتُ الصَّنَم ده نغمهء توحید باشلادیم
موجه فضای شام گلیب ، یا اِلاهیله
حکم حجابی ایلدی تَنفیذ عترتون
مستور ایدوبله مَه یوزی ، زلف سیاهیله
نیلی و ارغوان اولالی جسملَر دولوب
دین گلستانی هم گلله هم گیاهیله
بیزده غرورِفیضِ شهادت عیان ، ولی
هند اوغلی قیدِ نفسده ، حال تباهیله
چوخ سعی ایدردی گیزلده واضح شکستینی
تجدیدِ اشتباه ایلیوب اشتباهیله
قرآن اوخوردی ، دینه تظاهر ایده ، ولی
رسوا اوزون ایدردی دلیل و گواهله
قرآن اوخوردی لیک اوزی مست و خرابیدی
تاریخی روسیاه ایلدی بو گناهله
تطبیق ایدردی جهلیله آیات مُنزَلی
بیدادیله حُصوله یتن بیر رفاهله
باللهی ایتدی قلبیمی مجروح ، خیزران
رخساروی گورنده او خونین شَفاهله
سالدیم ایله تزلزله ارکان دولتین
گویا که تند باد اولوب توش ، کاهله
سیندیردی منطقیم ، او دنی اولدی لاجَرَم
مغلوب ، قاره معجره زرین کلاهله
زندان غم عجب دگی سجاده ، یوسفون
وار نسبتی هر آئنه ظلمات چاهله
خوشدور حدیث عشق و محبت بیان ایدم
تا تاپمیا کدر اورگون دودِ آهله
بیر اربعین ریاضت هجرانه دوزموشم
مانوس اولوب یانان اورگیم خانقاهله
درد دل ایتمیشم گجه گوندوز حسینِ من
گه قُرص آفتابله گه نور ماهیله
گه کربلا دیارینه مُلک دَمِشقدن
گوندرمیشم سلام ، نسیم پِگاهیله
گه قتلگاهی بُعدِ مَسافتله گورموشم
سیر ایتمیشم جمالوی طیّ نگاهیله
دل مُلکی عشقیله اولی تسخیر اولا بلی
نه زور و قدرتیله نه فوج سپاهیله
#عابد حسین دامنینی ایلمه رها
کسمه علاقه خسروِ عالَم پناهیله
آختار امید ساحلی ، غرقاب فتنه ده
فُلک نجاتیله نه تلاش و شناهیله
قورتولدی عمر ، خواب جهالتدن آچ گوزون
جبران ایله او غفلتی بو اِنتباهیله
ایله علاج دردیوه تا واردی فرصتون
شور ولایتیله ، دلِ عذرخواهیله
- جمعه
- 5
- شهریور
- 1400
- ساعت
- 22:57
- نوشته شده توسط
- یوسف اکبری
- شاعر:
-
ناشناس ؟؟؟
ارسال دیدگاه