شامده ویرانه ده قارداش اقامت ایلدیم
گوندوزی تبلیغ دین شبلر عبادت ایلدیم
من حقیقت شمعنه پروانه تک پَر وورموشام
قید ظلمی پنجه تیر غمیله قیرموشام
قدرت ایمانیله کفرون بِلین سندورموشام
سانما ماموریّتمده ذرّه غلفت ایلدیم
من سنه قربان اولوم ای فخر اولاد خلیل
کوفه ده مرجانه اوغلون ایتموشم زار و ذلیل
کفرینه قرآن مُنزَلدن گتوردوم چون دلیل
قلب مردمده اونا تولید نفرت ایلدیم
باشلادی گوردوم زیاد اوغلی منیله جنگ سرد
باغلادیم منده شهامتله کمربند نبرد
سویلدیم امّید حقله یاعلی سندن مدد
قدرت اللّهدن دوباره اخذ قدرت ایلدیم
باشلادیم بیر خطبه شهر کوفه ده با چشم تر
سوزلریم قویدی او دم قلب خلایقده اثر
ایلدیم هند جگر خوار اوغلونون سعیین هدر
آچدیم اُوجون ملّته کشف حقیقت ایلدیم
سالدیم آتش آتشین نطقیله قلب دشمنه
یاندروب ایتدیم مبدَّل کاخ ظلمی گُلخَنه
مطلبی آندیردیم آخر مو به مو مرد و زنه
حق دیوب حقدن حسینیم دفع تهمت ایلدیم
من دانشدوقجا آپاردی خلق پِی آمالیمه
باخدی یاندی مطلبه حالی اولانلار حالیمه
کف چالانلار داش آتانلار آغلادی احوالیمه
کوفه نی باشدان باشا دریای محنت ایلدیم
اوزگه بیر عالم مجسّم ایلدیم انظارده
انقلاب آثاری اولدی آشکار افکارده
چوخ گولَنلَر گوردوم آغلور یوزلری دیوارده
اوندا کی باشون جِدا باشندا رؤيت ایلدیم
جان ویروب سالدون تزلزل کاخ استبداده سن
منده ویران ایلیوب گلدیم ایا شاه زمن
حقی باطلدن آیردیم گون کیمی ایتدیم علَنَ
صفحه تاریخه حقانیتون ثبت ایلدیم
ایستدی دینی یزید کافر ایتسون استتار
تهمته دیل آچدی سسلندیم اونا ای کین شعار
کَس سَسون دینمه دانیشما سنده یوخ شرم و وقار
وقرینی پوزدوم او مجلسده خجالت ایلدیم
دوردی قارداش غیضله ایتدی منه حمله یزید
ایلدیم منده اونا حمله ایا شاه شهید
زینبم من قوخمارام سندن، دیدیم دور ای پلید
بیر بیر اعمالین سایوب محکوم او ساعت ایلدیم
دین یولوندا مرگدن زینب هراس ایتمز دیدیم
دیننی، دنیالری گر ویرسه لر ویرمز دیدیم
آلِ هاشم دشمنه باش اگمیوب اگمز دیدیم
بو سوزون اثباتینه طشته اشارت ایلدیم
اولدی رأس اطیبون بیر شاهد عادل منه
ابر چشموندن یاغان قان ویردی خوش حاصل منه
بیر نظرده ایلدون مین نصرت کامل منه
مجلسون وضعی پوزولدی شکر نعمت ایلدیم
باخمادیم وار دور و برده قان توکن جّلادلر
قانمی آماده دی توکسون او بد بنیادلر
مطلبه ویردیم ادامه باشلانوب ایرادلر
تا سیه بختین او بی رحمون سیه بخت ایلدیم
سویلدیم فکر ایتمه ظالم واردی سندن واهمم
گور کیمی تهدید ایدورسن هیچ بولورسن من کیمم
دختر شیر خدایم زینبم زینِ اَبَم
اهل مجلسدن بو سوزده سلب طاقت ایلدیم
ذرّه ای باک ایتمدیم اصلا او امر سختدن
انتقام آلدیم گوزی یاشلی او تیره بختدن
سالدی هند اوغلون بیانات فصیحیم تختدن
منطقی برهانله تا واژگون تخت ایلدیم
شکر لله من یزیدون پوزدوم استقلالنی
ایلدیم قرآنله تصویب اضمحلالنی
سرنگون ایتدیم جهاندا پرچم آمالنی
باغلیوب کابینه سین تعطیل او ساعت ایلدیم
اولدی آخر مسکنیم هرچند ویرانه منیم
یا مبدَّل اولدی گوزده گوزیاشیم قانه منیم
همّت مردانمه باش آگدی بیگانه منیم
صبر ایدوب دوزدوم بلایه کسب شهرت ایلدیم
بیر سفارتخانه ایتدیم شامده برپا حسین
قویدوم اوردا بر سفیر خرسال و مه جبین
ایلسون شام اهلنه تا وار جهان تبلیغ دین
عاقبت ویرانه کُنجین رشک جنّت ایلدیم
نه سفیر و نه سفارتخانه نه رشک جِنان
کعبه آمال دور اهل دله تا وار جهان
اُلدی اللرده رقیّم ویردی چوخ نیسگِلّی جان
حیف اولا بو باره ده شرمنده رجعت ایلدیم
بو (شعاع) چون اولدی شمع عشقوین پروانه سی
آدیمی سسلر اودور چوخلار حسین دیوانه سی
فخر دور بو آد منه ای فاطمه دُردانه سی
قبروی اولماز غمیم گورسَم زیارت ایلدیم
- جمعه
- 5
- شهریور
- 1400
- ساعت
- 22:58
- نوشته شده توسط
- یوسف اکبری
- شاعر:
-
حاج غلامعلی شعاع
ارسال دیدگاه