دييرديم درد هجرای قيامتدن علامتدور
وليكن هر دمی گوردوم كه مينلرله قيامتدور
تعالی الّه! اولور ساطع يوزوندن نور اشراقی
كه كوی عشق و عرفانه چو مصباح هدايتدور
يوزون عقلی ائدير يغما گوزون روحی سوزون جانی
خالون ايمانی خطّون دينی ای مَه بو نه حالتدور
دوزوبسن چشم مست اوسته خدنگ تار مژگانی
سنه قربان مگر جانا خيالون قتل و غارتدور
نگاه نرگس مستون ائدير ديوانه عشّاقی
گوزون قربانی ناز ايتمه داخی غمزن كفايتدور
قدين سرو و صنوبردن يوزون خورشيد انوردن
گوزون لبريز ساغردن لبون می دن حكايتدور
قاشون محراب اولوب مفتون عشقه دير و مسجدده
جمالون سيری اي دلبر بو عشّاقه عبادتدور
پريشان كاكلون جانا دئديم پابند كفر ايلر
وليكن آنلييب گوردوم كی ايمانه دلالتدور
قيام قامتون جانا گورن حيران اولوب سويلر
تعالی الّه: بوقامتدور؟ و يا سور قيامتدور؟
فروغ عارضون گورجك ديديم يارب نه صورتدور
وجاهت دور؟ ملاحت دور؟ ويا عين صباحتدور؟
يازاندا كاتب خلقت ازل گون مصحف عشقی
آدين تذهيب ديباچه او مصحفده كتابتدور
ملامت ايتمه گر عاشق اولوب مجنون زنجيری
اسير زلف ليلادور كه زنجير ارادتدور
طريق عشق جاناندا عزيزيم جان نه لازمدور
بويولدا ترك جان اتمك ازل گوندن شهادتدور
حقيقت آختاران عاشق گرك ترك مجاز ايتسون
نچون راه حقيقتده ازل ترك ضلالتدور
اورك باشون دَلَه هر آن سنون عشقنده مين پيكان
باسوب آغوشيمه جان تك يقين بولّم عنايتدور
اگر چه آرزو دلده ازلدن وصل يار اولموش
وليكن درد هجراندا نگاريمدن عنايتدور
تشكّر ايلرم منّت قويوب گر جانمی آلسان
سنون كوی وصالونده منه ئولمك سعادتدور
ندای ارجعی گر ايستی سن جانانيدن، دلدن
شهادت ايسته ای عاشق كه مفتاح ضيافتدور
خيال حور و كوثردن گيچوبدور (فانی) مسكين
فقير عشقه ای زاهد غم دلدار دولتدور
- شنبه
- 6
- شهریور
- 1400
- ساعت
- 23:34
- نوشته شده توسط
- یوسف اکبری
- شاعر:
-
فانی تبریزی
ارسال دیدگاه