چوخلی قدرتمندلر دنیاده گورموش روزگار
شیر مرد ِتک سوار و راد مرد ِنامدار
بیر سؤالیله جوابه دقّت ائت فرزانه وار
مرتضی تک پهلوان، شمشیری تک شمیشر وار؟
لافتی الّا علی لاسیف الّا ذولفقار
سیندی کعبه داخل اولدی فاطمه، بنت الاسد
گَلدی دنیایه علی اول عاشق حیّ ِصمد
ذاتی اثبات کلام ِ« قل هُو اللّه احد
گول کیمین مولوده ائتدی کعبه ی حق افتخار
لافتی الّا علی لاسیف الّا ذولفقار
خطبه ی عباسیده بو مطلبیم اولموش رقم :
مقدم پاک علی دن کعبه اولدی محترم.
کعبه بتخانه ایدی اولدی قبله و بیت الحرم.
تاپدی کعبه حضرت مولا علی دن اعتبار.
لافتی الّا علی لاسیف الّا ذولفقار.
پس علی نی دانسا هر کیم قبله سی بتخانه دی.
کعبه سی داشداندی منطقخانه سی ویرانه دی.
خالقه نا آشنا، توحید اوچون بیگانه دی.
حشریده حسرت چَکَر دائم اولار درده دچار.
لافتی الّا علی لاسیف الّا ذولفقار.
گورمویوب هئچ دین و مذهب مرتضی تک رهبری.
شاهلارین شاهیندن آرتیق دی غلام ِ قنبری.
مرحبی مغلوب ائدیب فتح ائیلیییبدی خیبری.
مرحبا گور بو درایت بو شجاعت کیمده وار.
لافتی الّا علی لاسیف الّا ذولفقار.
مرتضی تک بیر نفر اشک ِیتیمی سیلمه دی.
سجده سینده اوخ ایاقیندن چَکَنده بیلمه دی.
حق دَبی، حق مذهبی، حق مکتبی دَشیلمه دی.
کیمده وار دیر بو عطوفت بو عبادت بو وقار.
لا فتی الّا علی لاسیف الّا ذولفقار.
جنگ بدریله اُحُددا ائیله دی غوغا علی
ساخلادی اسلامیله پیغمبری مولا علی
پهلوانلار ایچره اولدی گورنه مُستثنی علی
الغرض فرمایش ائتدی جبرئیلِ کردگار.
لافتی الّا علی لاسیف الّا ذولفقار.
یوخ علی تک پهلوان، شمشیری تک شمشیر یوخ.
چوخدی گر شیر ِ فلک، شیر خدا تک شیر یوخ.
دهریده اللّهُ اکبر ، بیر بئله تکبیر یوخ.
چونکی بیر تکبیریلن ائیلَردی کفری تار ومار،
لا فتی الّا علی لاسیف الّا ذولفقار.
گوردی حاجی لر غدیر خُم دا ختم ِ مرسلی.
قالخیزیب حیدر الین فرمایش ائتدی منجلی.
من کیمین مولاسی ام، مولادی اول فرده علی.
بایرام اولدی چون علی نین حقّی اولدی آشکار.
لافتی الّا علی لاسیف الّا ذولفقار.
آیه گَلمیشدی گرک دینیز سیزین تکمیل اولا.
تا نبوت دن امامت اصلی ده تحصیل اولا.
بعد پیغمبر زعامت حیدره تحویل اولا.
کیم بو اصلی دانسا دینینده بویوک نقصان اولار.
لافتی الّا علی لاسیف الّا ذولفقار.
کاینات ِکلّ عالم ذرّه دی دنیا علی
هر ایکی دنیا و عقبا قطره دی دریا علی
گمره اولماز کیمسه سَسله نسه اورکدن یا علی
«یا علی»نین لذّتیندن قلب لر چوخ بی قرار.
لافتی الّا علی لاسیف الّا ذولفقار.
وار علی دن بیر اثر هر آیه گر تفسیر اولا.
سوزلری آیات قرآن دیر اگر تعبیر اولا
هر قَدَر فضلین دئسه ن هیهات اورکلر سیر اولا.
هر قَدر یازسان قوتارماز فضلی واردیر بیشمار.
لافتی الّا علی لاسیف الّا ذولفقار.
گور نئجه اعلادن عالی، عالیدن اعلا علی
والی ِحقدیر، ولیّ لم یزل مولا علی
اولماز احمدن سورا معراجیده الّا علی
سویله دی حیدر سَسیله سوزلرین پروردگار.
لافتی الّا علی لاسیف الّا ذولفقار.
کیم رکوعینده اوزوک بذل ائیلیییب الّا علی
کیمدی خلقی خالقه وصل ائلیییب الّا علی
انبیانی صاحب ِفضل ائلیییب الّا علی
یوخدی مرد الّا علی حقدن گَلیبدی بوشعار.
لافتی الّا علی لاسیف الّا ذولفقار.
مظهر عدل و عدالت جلوه ی خورشید علی
شافع یوم ِقیامت، مظهر توحید علی
یاور ختم نبوّت، چشمه ی امّید علی
شاه و سلطان امامت حجّت پروردگار.
لافتی الّا علی لاسیف الّا ذولفقار.
دهریده علم قضاوت رکنینی بنیان ائدیب.
جمله دانشمندی اوز تدبیرینه حیران ائدیب.
حشره جن علم عالمینده هرزمان طوفان ائدیب.
اعتلای علم ایلن اَعلَم لیقی معلوم لاشار.
لافتی الّا علی لاسیف الّا ذولفقار.
اسم اعظم دی علی قرآندا کی اسما ده وار.
آیه الکرسی نی گَزسَن عروه الوثقی ده وار.
عشق حیدر روح و جانِ حضرت زهراده وار.
کوثر و ساقیِ کوثر عبد پاک کردگار.
لافتی الّا علی لاسیف الّا ذولفقار.
اورگَدیب مولا بیزه دنیانی چوخ فانی گورَخ.
حقّه رغبت ائیله یَخ قرآنی نورانی گورَخ.
ناخدا حق اولماسا دریانی طوفانی گورخ.
ظالمی دکّ ائیله یَخ اما اولاخ مظلومه یار.
لافتی الّا علی لاسیف الّا ذولفقار.
اشجع لیل ِمبیت انوار سرمد دی علی
حافظ خیرالبشر جان ِمحمّد دی علی
ابتهالین آیه سینده نفس احمدی علی
کیمده واردیر بو شهامت بو مقام واعتبار.
لافتی الّا علی لاسیف الّا ذولفقار.
ذات حیدر شمع دی، عالم اونا پروانه دی.
اهل ِمعنا اولسا هر کیم عشقینه دیوانه دی.
«یا علی» ذکر اولسا هر یئرده اورا میخانه دی.
ایسته ریخ بیز مرتضانی عاشق و دیوانه وار.
لافتی الّا علی لاسیف الّا ذولفقار.
ائیله مست جام حیدر اولموشوخ خرد و کبار.
سَسله ریخ هر دم علی صبح و مساء، لیل و نهار.
عاشقیخ بیز مرتضایه واله و دیوانه وار.
بی قراریخ، بی قراریخ، بی قراریخ، بی قرار،
لافتی الّا علی لاسیف الّا ذولفقار.
یاندی درگاهی امامین پر پر اولدی فاطمه.
آزقالیردی صبری داشسین عمری تاپسین خاتمه.
قدرت ِایمانیله صبر ائتدی بو عظما غمه.
حضرتِ زهرا آدیلان تاپدی حقدن اقتدار.
لافتی الّا علی لاسیف الّا ذولفقار.
هانسی پیغمبر علی تک اولدی عالمده سعید؟
کعبه ده دنیایه گَلدی، اولدی مسجد ده شهید.
قانی محرابه توکولدی رتبه سی اولدی مزید.
سویله دی «فزت و رب الکعبه»:اولدوم رستگار.
لافتی الّا علی لاسیف الّا ذولفقار.
گور (عزیزا) سن هارا، بو یازدیقین سوزلر هارا.
سن هارا، حمد و ثنای حضرت حیدر هارا.
لایق کیفر هارا، گور شافع محشر هارا
چون الین بوشدور بو شعری ساخلا حشره یادگار.
لافتی الّا علی لاسیف الّا ذولفقار.
- شنبه
- 6
- شهریور
- 1400
- ساعت
- 23:49
- نوشته شده توسط
- یوسف اکبری
- شاعر:
-
کربلایی عزیز خانشی
ارسال دیدگاه