چون خیمه لرده اوچ گونودی قحط ِآبیدی
سوزِ عطشدن آل ِعلی دل کبابیدی
بیر جمع تشنه قیز گلوب عبّاس حضورینه
اللرده جامِ خشگیدی ، گوزلر پر آبیدی
گورجک بو حالی حالی پوزولدی او سَرورین
غیرتده چون آتاسینا نایب منابیدی
بوندان علاوه ایتمیشدی بسکه سو سبیل
سقّاليقا او چولده آدی انتخابیدی
اولدی سوار عقابه قویوب رزمگاهه یوز
مأذون اذن ِشاه جلالت مآبیدی
شرق ِخیمدن ایتدی مهِ هاشمی طلوع
ماه ِسپهره نور دمِ اکتسابیدی
گورجک او نوری خیره لنوب اشقیا گوزی
گویا که گون ضیاسی قرین سرابیدی
تا یتدی اشقیایه آچوب دل نصيحته
گور صادقی که ناصح قومِ کذابیدی
حق بولمینلر ایتمديلر حق سوزون قبول
گر چه تمام سوزلری رأی صوابیدی
بیر کسده قدرت اولمادی ویرسین جوابینی
حق کلمه سینده فرقهٔ باطل مجابیدی
غيظیله حمله ایتدی قوشون اوسته گوئیا -
شهباز ِعشق قصدی شکارِ غُرابیدی
عَمرو اوسته خندقه دیه سن مرتضا گیدیر
شمشیری ذوالفقاریدی دُلدُل عقابیدی
اویناردی برق تک اوزون الده ایتی قلیج
اود یاغدیرردی دشمنه تیرِ شهابیدی
شمشیرِ برقی جانینه اود سالدی دشمنین
توشِ عذاب ، ئولمه میش اهلِ عذابیدی
لشکر گوزونده تیره و تار اولدی رزمگاه
گر چه قلیج وران اولارا ماهتابیدی
روباه وار قاچدی یَلانِ عرب تمام
اعدا اوزون ایتیردی ، ایله پیچ و تابیدی
آتلار صداسی نعره سسی بانگِ الحذر
بیر اوزگه شور ِحشریدی بیر انقلابیدی
یاردی نهنگ صولت او دریای لشگری
دشمن داغیلدی صاق صولا گویا حبابیدی
بیر یول آچوب او سروِ خرامانِ مرتضا
گویا فرات خيبرينه فتحِ بابیدی
آلدى شريعه نی ، علی خیبر آلان کیمی
بیر کس که صولتی او شهه انتسابیدی
باخدی سویا سوسوزلوقی آرتوب دوباره دن
از بس عطشدن اوچ گونودی سلبِ تابیدی
بو اوچ گونی که سو یولونی باغلاموشدولار
دللرده تشنه ليق اودی پُرالتهابیدی
فکر ِعبث دی ، گلمسین هرگز خیالوه
عطشان تمام ِعترت ِختم ِمآبیدی
هی سو گلوردی خیمیه سیراب اولوردولار
سیراب ایدن او جمعی دیمه اشکنابیدی
اوچ کیمسنیدی اوچ گئجه گوندوز سوسوز قالان
نفسین ایدن مباح سودان اجتنابیدی
بیر شاهِ تشنه کامیدی سو میل ایتمین
بیرده باجیسی زینبِ عليا جنابیدی
بیرده بو که سوسوزلارا سقائیدی اوزی
چگنینده مشک تشنه لبی لعل ِنابیدی
ائیچمزدی ، سو تاپاندا ویرردی اوشاقلارا
مبهوت اونون وفاسینه هر شیخ و شابیدی
القصّه دولدورب ائیکی اوجین آخار سودان
حیران قویان جهانی بو امرِ عجابیدی
نفسين مذّمت ایتدی توکوب تازه دن یره
عبّاس - حسین سوسوزدی بو نه میلِ آبیدی
دولدوردی مشگینی اوزی چخدی سوسوز سودان
اوّلده مستِ جامِ شرابِ خوشابیدی
هر سمته باخدى باشلادی بیر یول ، همان او یول
نزدیکِ راه خيمه عرش احتجابیدی
یوز قویدی خیمه گاهه طرف شوق وذوقيله
ایلردی هر نه همّت و سعی و شتابیدی
ناگاه قویدی اوخلاری بیردن کمانلارا
بولمم او قومده بو نه شرم و حجابیدی
اول گلشنِ وجودينه گویا صفا ایچون
اوخ یاغدیران یاغیش کیمی گوگدن سحابیدی
نه سعیِ جنگ ایدردی نه بیر حمله لشکره
امّا تمام جهدی فقط حفظ ِآبیدی
ایستردی مشگی بلکه یتورسون سوسوزلارا
اطفاله سو آپارماقیله کامیابیدی
کشفِ مصیبت ایتماقا یوخ گر چه اختیار
امّا اولوب ، يازوبدیلار شرحِ کتابیدی
بابِ اشاره مجملاً عرض ایلیم گرک
بیر غم که هر کتاب ِغمه نئچه بابیدی
شیر اوغلی شیری گَلّهء روباه ایدوب شکار
اُف روزگاره ، دوری ازلدن خرابیدی
قول ویردی سو آلانمادی دویدی حیائیدن
جان نقدى الده راغبِ مرگ ، اول جنابیدی
پیکانِ ظلم پیکِ اجل اولدی آنّینا -
دگدی ، ولی حقیقتِ عشقه نصابیدی
ایستردی خارج ایتسون اوخی سجده گاهدن
شکرانه سجده ایتماقا جای ثوابیدی
ال خدمتین رجوع ایلدی هر ایکی دیزه
ال عُذری بو خصوصیده چوخ باحسابیدی
ویردی تکان عمامه باشندان دوشوب يره
سنده باش آچ ، که باشین آچان بوترابیدی
باشی آچوخ قالاندا گلوب بیر نفر شقی
الده دمیر عمودیدی دلده عتابیدی
امّ البنین روحینی آغلار قویان هنوز
اوردا اولان او نچه سؤال و جوابیدی
یا فاطمه نئجه دیوم آتدان دوشن زمان
نچه قدم ایاقی که بندِ رکابیدی
از بس یورولموشیدی دوشوب نطقسیز یاتوب
گوردی که قان حریری عجب رختخوابیدی
گَلدی امام او دمده گوروب ناز بستری
فرزندِ بو توابون او قانلی ترابیدی
سسلندی دور اویمی ، یخان قدیمی بوکن
دشمن دوتوب بو دشتی مگر وقتِ خوابیدی
قارداش سسين آلاندا گلوب جانه تازه دن
حسّ ایلدی باشی اوسته گلن آفتابیدی
عرض ایلدی باغشلا آقا گورموری گوزوم
قان پرده سی گوزوم قباقیندا نقابیدی
شاه شهید آنلادی قارداش مرامنی
آخر امام عالِمِ سرّ غیابیدی
بولدی که یوخ الی سیله قانلان دولان گوزی
بو باره دن چون حسرتِ دل بی حسابیدی
سیلدی او ساربان کسن ال قارداشین گوزون
نه حالده گور اول شه مالک رقابیدی
فرمایش ایتدی خیمه دن ایمدی گَلنده من
چوخ منتظر رقیه ، سکینه ، ربابیدی
عرض ایلدی خیامه برادر گیدنمرم
خجلت مصیبتی چون اشدُّ المصابیدی
میداندا قویدی قارداشینی گلدی خیمیه
بولدی مرامی قارداشین عهدِ شبابیدی
بوش مشک الده گوزده دولی اشگ ، مُشک سا
دلده کلام و ذکری همین بو خطابیدی
گَل ای آنام نشانه سی غم پروریم باجی
گور قلبیمی نه نوعيله پُر اضطرابیدی
عبّاسیم ئولدی ایمدی گرگ یاسینی دوتام
يغ باشیمه نقدر که عصمت مآبیدی
سویلوب خيامه بس نیه نعشين گتورمدون؟
سپماقه زخمِ جسمنه گوز پر گلابیدی
فرمایش ایتدی علّتی واردور گلنمدی
بوینوندا گر چه رشته ءالفت طنابیدی
سو اولمادی الی بوشیدی گوزلری دولی
آهیندن اودلانان فلک ِنُه قبابیدی
سو ایچمدی اوزی ولی بو چولده قانیله
گلزارِ دينه ویردی او که آب تابیدی
جان اوسته العطش دیمدی تشنه ویردی جان
معلوم اولان که مایلِ عالی شرابیدی
وصلِ نگار ایچون یوخودی ال خضاب ایده
باشدان اياقه جسمی ولی قان خضابیدی
توک گوز یاشی ذخیره ائیله حشره (شأنیا)
روز ِجزاده هر بیری بیر دُرّ نابیدی
ایسته او غملی قبرینی یا کربلا چاغور
عبّاس آدی گلنده دعا مستجابیدی
- یکشنبه
- 7
- شهریور
- 1400
- ساعت
- 12:37
- نوشته شده توسط
- یوسف اکبری
- شاعر:
-
مرحوم حسین شانی تبریزی
ارسال دیدگاه