الیمدن ای باجی سردار کامران گیتدی
قرار و صبریمی الدن آلوب عیان گیتدی
بو قدر دشمن الینده منی قویوب یالقوز
الیمی اوزدی الیندن، او ال دوتان گیتدی
نجه حصار مخالفده اولمارام محصور
وجود امنیمه محکم حصار اولان گیتدی
حجازه بیرده گیدم من عراقدن هیهات
حجاز علاقه سینی کسدی اول زمان گیتدی
وطن هارا من هارا؟ باجی جان بو غربت آرا
وطن دیوب وطن افکارینی آتان گیتدی
دوشوب تلاطمه بحر بلاده فلک نجات
بو قانلی موجه دوشن غرق اولوب باتان گیتدی
هانی ایلیم هانی آرخام هانی بنی هاشم؟
بویاندی قانه نچه هاشمی جوان گیتدی
هرای غربت الیندن، امان کمکسیزلیق
کمک لریم منی یالقوز قویوب، امان گیتدی
بو قدر بیل قوشونوم سیندی، بیرقیم یاتدی
عزیز جانیم علمدار جانفشان گیتدی
آلوب الیمدن ابوالفضلی بوکدولر بلیمی
غم فراقی ایدوب قدیمی کمان گیتدی
سالوب تحیره دشمن لری مواساتی
وفاسین اهل وفایه ویروب نشان گیتدی
سو ممکنیدی ایچه، ایچمدی وفاسیندن
اوزی سوسوز سو کنارنده ویردی جان گیتدی
اوزونوده، مشگینی ده، ظلم الیله اوخلادیلار
بویاندی قانینه سقای تشنگان گیتدی
بدندن آخدی سو تک قانی، سو، سو مشگیندن
قاریشدی بیر بیره قان سو، سو آخدی، قان گیتدی
نجه من آغلامارام قانه گوز یاشیم دونمز
گوزوم باخا باخا دلدار دلستان گیتدی
چوخ ایستدی سالا قول بوینوما، یوخیدی الی
اورکده قالدی اونون حسرت نهان گیتدی
دئدیم یاواش گئت اوزومده دالونجا من گلم
یولومدا قانلی گوزی قالدی ناگران گیتدی
نه صبر ممکن اولور نه اورک دوزور دایانور
کسیلدی صبر داخی طاقت و توان گیتدی
گورنده باشینی گون تک جدا بویی اوجالوب
اوجالدی ناله سسیم عرشه دین فغان گیتدی
باجی دئمه که ابوالفضل ئولوب، حسینیم وار
منیم ده جانیم ابوالفضلیله اینان گیتدی
او جان ویرنده منیم حال احتضاریمیدی
منیله قارداشمون روحی توامان گیتدی
دایانما سنده اسارت تدارکین باشلا
پوزولدی رونقون اعزاز و جاه و شان گیتدی
چکلّه شامه اسیر، اهل بیت طاهانی
گورله حافظ اولان طُرفَه پاسبان گیتدی
نه گلدی ذهنوه (ذهنی) قلم قویولدی یره
مگر سنون قلموندن دوتوب یازان گیتدی
- یکشنبه
- 7
- شهریور
- 1400
- ساعت
- 13:40
- نوشته شده توسط
- یوسف اکبری
- شاعر:
-
استاد مرحوم ذهنی
ارسال دیدگاه