درسبک
کربلا منتظرماست.....
بابا جان نیزه باشیندا نئلر اولدی ده گوروم
نیه اوش یاشدا بالون دربه در اولدی ده گوروم
بیزه بیر قطره ده سو اولمادی قسمت باباجان
زینبون توکدی یوزه گریه ی حسرت باباجان
بیر گئجه یاتماموشام خیمه ده راحت باباجان
نیه عمم تالانیب خون جگراولدی ده گوروم
یاغدیریب تیر بلا اکبریوه قوم دنی
دشت محنتده اونون نیزلر اولدی کفنی
بویانیب قانه بابا اصغریون گول بدنی
جانثارون نیه بس صود امر اولدی ده گوروم
اهل کین قویمادیلار قارداشیوی سوگتیره
سویی مخیمده یانان طفل وبناته یتیره
اولدی عباسین اودم غیرت وایمانه گوره
نیه سقانی وئیران مین نفر اولدی ده گوروم
نوجوان قاسمی ظلمیله الین دوغرادیلار
قلب زهرانی گینه کوفه لیلر داغلادیلار
قیزلارین زینبیلن سینه وییریب آغلادیلار
کفنی قاسمه آیا سپر اولدی ده گوروم
تلیدن مقتله زینب نگران باخدی اوگون
قانلی میدانی گوروب قلبینه قان آخدی اوگون
حالیوه آغلادی گوی ایلدیریمی شاخدی اوگون
نیه قسمت بیزه آه وشرر اولدی ده گوروم
هانسی یئرده بئله مهمانه جفا اولدی بابا
هانسی پیکر نچه گون چولده رها اولدی بابا
دهریده کیم سنی تک دینه فدا اولدی بابا
منی تک هانسی بالا دیده تر اولدی ده گوروم
سن گئدنن سورا من صبح ومسا آغلاموشام
اکبری یاده سالیب سینمی چوخ داغلاموشام
دادیمه یوخدی یتن عممه بل باغلاموشام
هانسی جیران بئله چولده ملر اولدی ده گوروم
نیزه اوسته منیلن هم سفریدین باباجان
بیلیرم حالیمه سن باخبریدین باباجان
دشت وصحراده گئجه چون قمریدین باباجان
هانسی ملت بیزه تای در به در اولدی ده گوروم
اسرا ایچره بابا بیر گون ایتیردیم یولوی
تانیا بیلمدیم اول دشتیده من ساق سولومی
اشقیا قمچی لر ی یاره ائدیب ال قولومی
نیه بو غملی سفرپر خطر اولدی ده گوروم
گولدی شام اهلی بیزه خارجی اولدی آدیمیز
عرشه چاتدی بومصیبتده بیزیم فریادیمیز
حب اولاد علی اولدی بیزیم ایرادیمبز
نیه محنت بیزیلن هم سفر اولدی ده گوروم
- شنبه
- 17
- تیر
- 1402
- ساعت
- 18:42
- نوشته شده توسط
- یوسف اکبری
- شاعر:
-
عبادی طارمی
ارسال دیدگاه