ای رزم گونی حیدرِ کرّاری حسینون
قولسوز یخیلان جعفرِ طیّاری حسینون
بیر مشگ سو اوسته کسیلن اللره قربان
امدادینه قارداش چاغوران دللره قربان
راضیدیم ئوله تشنه لب اطفالِ لب عطشان
هر تک تکی بو چولده اولیدی سنه قربان
امّا سنه ال تاپميا بو فرقهٔ عدوان
سنلن مَثَليم جدّیمه حيدر مثلیدی
یا حیدریلن مالکِ اشتر مثلیدی
قارداش نجه نعمتدی ویرر قارداشا الله
بولمز بیری تا اولمیوب اسرارینه آگاه
بخصوص یامان گونده محیط اولسا خطرگاه
فرض اولسا بدن جان کیمیدی قارداشا قارداش
عِرقنده گزن قان کیمیدی قارداشا قارداش
ئولدورمه سلر گر منی سندن صورا اعدا
خضر عمريجه عمروم اولا گولمز یوزوم اصلا
بیر درد اولی دردون منه که یوخدی مداوا
بو دردین علاجین هامی لقمان اولا بولمز
واللهی ئولوم اولماسا درمان اولا بولمز
کیم بولدی سسون گلدی پوزولدی نجه حالیم؟
نه حاله قالوب سِیر ایله دیم من نه عَواليم
بیر بولدى باجیم بیرده بولر خالقِ عاليم
فکريم داغيلوب محوِ جمال اولدوم ابوالفضل
دل سیز کیمی بی نطق و مقال اولدوم ابوالفضل
دوردوم که گلم داده گؤزوم گؤرموری گؤردوم
سالدوقجه غمون یاده گؤزوم گؤرموری گؤردوم
اولدوم ایله افتاده گؤزوم گؤرموری گؤردوم
علّت بودی تأخیریمه وقتیم تلف اولدی
تأخیرده بیر مایهٔ حزن و اسف اولدى
گؤرموردوم ازل هاردا يخوبدی سنی کفّار
کسمیشدی یولی لشگرِ بدکیش و تبهکار
سیندیردی صفِ دشمنی شمشیرِ شرربار
فکريم که گیدردی هارا من يول اورا سالديم
ناگاه آنام فاطمه نون عطرینی آلدیم
شوریله فضادن آنامون عطرین آلوردوم
گلدوقجه یولی عطر گلن سمته سالوردوم
گاهی اگیلیردیم یره گاهی اوجالوردوم
ناگه بو ایکی عادل اولان رهبری تاپدیم
سو اوسته بو ناحق کسیلن اللرى تاپدیم
گویا آناما کشف اولوب آشفته دی حالیم
قارداشیما دشمن تاپوب ال ، چوخدی ملاليم
یالقوزليوب اعدا منی پوزقوندی خیالیم
تاب ایلمییوب تکلیقیما داده گلوبدی
امداد ایلسون اوغلونا زهراده گلوبدی
اولدی سبب اوچ رمز و علامت سنی تاپدیم
بیر علّت اولوب مِهرِ اُخوّت سنی تاپدیم
بیر ائتدی آنام عطری هدایت سنی تاپدیم
بیرده کسیلن اللّريوین قان ریزی قارداش
یوخسا یولی قویمازدی گورم گؤزده کی قان یاش
طوبا سنون احواليوه اقبالیوه احسن
اولدون شهداده هامودان شأنی مُحَسّن
بو عطر مُصَدّقدی که زهرانی گؤروبسن
شاید یوزیوه قویموش اولا عارضِ آلين
قوی منده زیارت ایلیوم سنده جمالین
بو نسگلون اوتلار منی تا روزِ قیامت
بیر گؤز که ایده حضرتِ زهرانی زیارت
انصاف دگولدی اونا بو ظلم و جسارت
بو یاره که بودیدهٔ شهلایه دگوبدی
بلکه دوشوب عکسی رخِ زهرایه دگوبدی
اهلِ حرمه صبر و تسلی ویره الله
محشر اولاجاق اولسالار احوالیوه آگاه
دور تک یولا سالما منیلن اول گینه همراه
گوستر بالاجا قیزلاریما اوخلی سو مشکین
جام الده گزوب خیمه لری توكمه سین اشکین
بو حالیده سندن نجه صرفِ نظر اولسون
گئتسم نگرانم که عدو باخبر اولسون
الدن اليوه ال تاپانی بی ثمر اولسون
اولسیدی الون رفعِ شر ایلردون اوزوندن
بیر نحویله دفعِ خطر ایلردون اوزوندن
ای (حافظی) اولدی (حسنی) بانی اشعار
سندن سبب اولدى قالا دنیاده بو آثار
ایسته صله ویرسین یدِ مقطوعِ علمدار
اعطاسینی شکرانهٔ نعمت بولوسن بول
یا لطفينه احسانينه قسمت بولوسن بول
- یکشنبه
- 7
- شهریور
- 1400
- ساعت
- 15:52
- نوشته شده توسط
- یوسف اکبری
- شاعر:
-
مرحوم حافظی تبریزی
ارسال دیدگاه