دگدوقجا قانلی زلفوه باد سحرعلی
سنبل کیمی جمالوه تِل تِل دوزر علی
الدن آلار بو بیکس آناوین قرارینی
اولدوقجا تار و مار او گیسوی تر علی
بولَم داهی بو قانلی سفردن قیتمَسَن
اولدی همشیه لیق سفرین بو سفر علی
گئتمه دئدیم اوغول گوز ائویمدن اوزاق یئره
چوخدور بو چولده قورخلی صیّادلر علی
باش دوتمیان سوز اولدی گئتدون عاقبت
قیلدی نشانه حلقوی تیر سه پر علی
آخدی آخار سولار نئجه بیهوده چوللره
سن ایچماقا تاپولمادی بیر مختصر علی
آخر آیردی بیربیریمزدن فلک بیزی
اولدی آنان قیامته جان در بدر علی
سنله یارالی چوخ گئجه عالملریم اولوب
بیرده آنان او عالمی هاردا گورر علی
سود اولمیوبدی اوچ گجه سس سسه وئروب
سن آغلیب من آغلامشام تا سحر علی
آچ قان دولان گوزون بیر اویان خواب نازدن
دور گور قالیب نه حاله بو شوریده سر علی
دوشسه سو جامینه نگران گوزلریم اگر
سولموش جمالوون سودا نقشین گورر علی
گهواره وی اوغول نچه مدتی توز باسیب
پاک ایلیر غبارینی مژگان تر علی
ناز ائتمه بو قدر منه ای نازنین بالا
آخر بالا آناسینه بیر سس وئرر علی
دوشموش نئدن بئله چوخورا قانلی گوزلرون
معلوم اولان عطش ایلیوب چوخ اثر علی
دیداریمز اوغول داهی قالدی قیامته
اوندا آنان سو جامی الینده گَلر علی
یاندون ولی سو ایسته ماقا اولمادی دلین
بو نسگلون ربابیله قبره گئدر علی
گوز داغی ایله وئردی فراتین سویی منه
واللهی ائتمرم سووا بیرده نظر علی
بیر اوخ یامان چووردی اوغول روزگاریمی
بوندان بیله منیمده دونرگم دونَر علی
سن بزم یاره یاره لی گئتدون گوله گوله
قویدون غریب آناوی بو چولده مَلَر علی
باغریم کیمی فراتیده قانه دونیدی کاش
وئردی بو سو منه نئجه خون جگر علی
دیرناقلارون قالیبدی یئری داغلی سینه ده
سندن ربابه قالدی فقط بو اثر علی
بیر سوت اَمر گورنده پریشان اولور گوگل
مجروح سینم اوسته یئرین گورسنر علی
هر گون سنون خیالیویله بو غریب آنان
قنداقوون بوشون گه آچیب گه بَلَر علی
لای لای دئیر رقیه باجون سوز و سازیله
بوش گاهواره وی گئجه لر ترپَدر علی
سندن صورا صفالی یئری مسکن ائتمرم
چوللرده خوش گونوم گون ائوینده گچر علی
اَمدون عجب دگول اوخی میدان عشقیده
عطشان وصل سو یرینه قان ایچر علی
باد صبا دگینده اوغول قانلی تللره
الله بولور رباب نه حاله دوشر علی
- یکشنبه
- 7
- شهریور
- 1400
- ساعت
- 15:56
- نوشته شده توسط
- یوسف اکبری
- شاعر:
-
حاج صمد قاسمپور
ارسال دیدگاه